काठमाडौं । राष्ट्र उत्थान लघुवित्त वित्तीय संस्थाको आईपीओ नेपाल स्टक एक्सचेञ्ज(नेप्से)मा सूचीकृत भएको छ ।बिहीवार कम्पनीको २६ लाख कित्ता आईपीओ नेप्सेमा सूचीकृत भएको हो ।
अब कम्पनीको आईपीओ आउँदो आइतबार अर्थात फागुन २९ गतेदेखि दोस्रो बजारमा कारोबार सुरु हुनेछ ।
कम्पनीको आईपीओले पहिलो कारोबारको लागि नेप्सेबाट १६७ रुपैयाँ ४३ पैसादेखि ५०२ रुपैयाँ २९ पैसा ओपन रेञ्ज पाउने देखिएको छ ।
कम्पनीको आईपीओ जारी पश्चात उसले पाउने ओपनिङ रेन्च कम्पनीको पछिल्लो प्रति सेयर नेटवर्थको आधारमा तय गरिन्छ ।
कम्पनीको आर्थिक वर्ष २०७७/७८ को वास्तविक नेटवर्थ १६७ रुपैयाँ ४३ पैसा रहेकाले उक्त रेञ्ज पाउने देखिएको हो ।
नेप्सेले पहिलो कारोबारको लागि नेटवर्थको तीन गुणासम्म मूल्य रेञ्ज तोक्ने भएकाले कम्पनीले उक्त रेञ्ज पाउनेछ ।
लघुवित्तको आइपीओको फागुन १२ गते बिहीबार बाँडफाँड भएको छ । आइपीओ गोलाप्रथाबाट बाँडफाँट भएको थियो ।
जसमा ७९ हजार ४५० जनाले मात्र सेयर हात पारेका छन् भने बाँकी २५ लाख ५५ हजार १७६ जनाको भने हात खाली भएको छ ।
कम्पनीको आइपीओमा ३ अर्ब ५ करोड २० लाख ८८ हजार रुपैयाँ बराबरको आवेदन परेको थियो । जसमा २६ लाख ३४ हजार ६२६ जनाले ३ करोड ५ लाख ३१ हजार ३७० कित्ताका लागि आवेदन दिएका थिए । यो सर्वसाधारको लागि बिक्री खुला गरिएको कित्तालाई आधार मान्दा ३८.४२ गुणा बढी आवेदन हो । यसमा मागभन्दा ३८.४२ गुणा बढी आवेदन परेको थियो ।
बिक्री प्रबन्धक एनआइबिएल एस क्यापिटल रहेको छ ।
वि.सं.२०७८ फागुन २६ बिहीवार ११:५६ मा प्रकाशित
