काठमाडौं । चालु आर्थिक वर्ष २०७८/७९ को आठ महिनामा साढे ११ करोड बढीको नेपाली चिउरा निर्यात भएको छ । पछिल्लो समय नेपाली चिउराले अन्तर्राष्ट्रिय बजार पाउन थालेको हो ।
नेपालबाट विश्वका ९ मुलुकहरुमा ११ करोड ५४ लाख १ हजार रुपैयाँ बराबरको चिउर बाहिरिएको हो । भन्सार विभागका अनुसार चालु आवको फागुन मसान्तमा नेपालबाट ३ लाख ४७ हजार ९२७ केजी चिउरा निर्यात भएको हो ।
पछिल्लो एक महिना अर्थात माघ मसान्तसम्मको तुलनामा भने चिउरा निर्यात २८.१५ प्रतिशतले वृद्धि भएको हो । चालु आवको माघ मसान्तसम्ममा ९ करोड ४९ हजार रुपैयाँ बराबरको २ लाख ८६ हजार ७९८ केजी चिउरा नेपालबाट बाहिरिएको थियो ।
धानलाई भिजाएर ढिकी वा मीलमा कुटेर तयार पारिएको अन्नलाई च्युरा भनिन्छ । सजिलै सँग जताततै उपलब्ध हुने, भण्डारण गर्न सकिने तथा ’जुठो’मा नगनिने भएकोले खानपिनमा यो एकदमै प्रचलित छ । दहि, मासु, मिठाई लगायतका अन्य धेरै परिकारसँग पस्किन सकिने भएकोले च्युरा अति प्रचलित छ ।
नेपाली चिउरा विश्वका ९ मुलुकहरु अमेरिका, अष्ट्रेलिया, इटली, जापान, बेलायत, कोरिया, बेल्जियिम, भारत, हङकङमा पुग्ने गरेको विभागले जनाएको छ ।
चालु आवको ८ महिनाको अवधिमा सबैभन्दा बढी चिउरा अमेरिका पुगेको छ । उक्त देशमा फागुन मसान्तसम्ममा ७ करोड २ लाख ३८ हजार रुपैयाँ बराबरको १ लाख ५७ हजार ५७४ केजी चिउरा पुगेको हो ।
उक्त अवधिमा अष्ट्रेलियमा १ करोड ८३ लाख १७ हजार रुपैयाँ बराबरको ६१ हजार ६९९ केजी चिउरा निर्यात भएको छ ।
यस्तै, इटलीमा ९९ लाख ४९ हजार रुपैयाँ बराबरको २२ हजार ८५९ केजी, जापानमा ५० लाख ९८ हजार (२९ हजार १३० केजी), बेलायतमा ४६ लाख ६७ हजार (१२ हजार १६२ केजी), कोरियामा ३० लाख ६२ हजार( १५ हजार ११२ केजी) रुपैयाँ बराबरको चिउरा पुगेको छ ।
त्यसैगरि बेल्जियममा १८ लाख ७७ हजार रुपैयाँ बराबरको ६ हजार ६२८ केजी, भारतमा १४ लाख ७६ हजार (३३ हजार ८१० केजी) र हङकङमा ७ लाख १९ हजार रुपैयाँ बराबरको ८ हजार ९५३ केजी नेपाली चिउरा निर्यात भएको हो ।
वि.सं.२०७८ चैत ९ बुधवार १७:१९ मा प्रकाशित
