काठमाडौं । चैत २९ गते अर्थात गत मंगलबार बलेफी हाइड्रोपावर कम्पनीको आईपीओ बाँडफाँड सम्पन्न भयो ।
कम्पनीको आईपीओ गेलाप्रथाबाट बाँडफाँड भएको हो । मागभन्दा धेरै आवेदन परेकाले गोलाप्रथाबाट बाँडफाँड गर्दा भाग्यमानी १ लाख ६६ हजार ३ सय ४२ जनाले मात्रै १०÷१० कित्ता सेयर भएका छन् । यीमध्ये ३ जनाले भने थप १/१ कित्ता सेयर पाएका छन् ।
बिक्री प्रबन्धक ग्लोबल आइएमई क्यापिटलका अनुसार बाँकी २१ लाख ३ हजार ६८ जनाको भने हात खाली भएको छ ।
कम्पनीको आईपीओ अहिले सूचीकरणको प्रक्रियामा रहेको छ । कम्पनीको आईपीओले पहिलो कारोबारका लागि ९३ रुपैयाँ ६४ पैसादेखि २ सय ८० रुपैयाँ ९२ पैसासम्म ओपनिङ रेञ्ज पाउने देखिएको छ ।
कम्पनीको आर्थिक वर्ष २०७७/७८ को प्रतिसेयर नेटवर्थ ९३ रूपैयाँ ६४ पैसा रहेको छ । जसकारण कम्पनीको आईपीओ उक्त ओपन रेञ्ज पाउने देखिएको हो । नेप्सेले हरेक कम्पनीको पहिलो कारोबारको लागि वास्तविक नेटवर्थको तीन गुणासम्म ओपनिङ रेञ्ज तोक्ने गर्दछ ।
कम्पनीले चैत्र १६ गतेदेखि प्रतिकित्ता १०० रुपैयाँ अंकित दरका १८ करोड २७ लाख ९७ हजार रुपैयाँ बराबरको १८ लाख २७ हजार ९ सय ७० कित्ता आईपीओ निष्काशन गरेको हो ।
जसमध्ये ७३ हजार १ सय १९ कित्ता सेयर कर्मचारीहरुका लागि, ९१ हजार ३ सय ९८ कित्ता सेयर सामूहिक लगानी कोषका लागि र बाँकी १६ लाख ६३ हजार ४५३ कित्ता सर्वसाधारणका लागि छुट्याइएको थियो ।
कम्पनीको आईपीओमा चैत्र २१ गतेसम्म २२ लाख ६९ हजार ४ सय १६ जनाले २ अर्ब ६२ करोड २२ लाख ९७ हजार रूपैयाँ बराबरको २ करोड ६२ लाख २२ हजार ९ सय ७० कित्ताका लागि आवेदन दिएका थिए ।
वि.सं.२०७९ वैशाख २ शुक्रवार १४:४६ मा प्रकाशित