काठमाडौं । नेपाल राष्ट्र बैंकले भुक्तानी प्रणाली सम्बन्धी एकीकृत निर्देशन–२०७८ मा संशोधन तथा थप गरेको छ ।
राष्ट्र बैंकले भुक्तानी प्रणाली सम्वन्धी एकीकृत निर्देशन-२०७८ मा संशोधन गरी वालेटमा रकम लोड गर्दा अनिवार्य प्रयोजन खुलाउनु पर्ने व्यवस्था गरेको हो ।
राष्ट्र बैंकले अ.प्रा.निर्देशन नं. ५/०७८ को बुँदा नम्बर १(५) मा संशोधन गरेको हो । अब सामान्यता क्रेडिट कार्डबाट नगद कारोबार गर्न नपाईने भएको छ । तर, अत्यावश्यक भएको अवस्थामा कार्डको स्वीकृत सीमाको १० प्रतिशतसम्म नगद झिना पाइनेछ ।
साथै क्रेडिट कार्डमार्फत वालेटमा लोड गरिएको रकम वस्तु तथा सेवाको विद्युतीय भुक्तानीका लागि मात्र प्रयोग गर्नुपर्नेछ । उक्त रकम बैंक खातामा ट्रान्सफर गर्ने र नगद झिक्न नमिल्ने व्यवस्था सम्वन्धित भुक्तानी सेवा प्रदाक संस्थाले गर्नुपर्ने राष्ट्र बैंकले जनाएको छ ।
यस्तै, राष्ट्र बैंक अ.प्रा. निर्देशन नं.१४/०७८ को बुँदा नं.१ मा उपबुदा (६) र (७) मा थप गरेको छ । बुँदा (६) अनुसार विद्युतीय वालेटमा ग्राहकले खाता खोल्दा तथा ग्राहक पहिचान विवरण अद्यावधिक गर्दा पशे गरेको विवरण ठिक साँचो रहेको तथा सो विवरण झुटो ठहरिएमा कानून बमोजिम सहुँला/बुझाउँला भन्ने व्यहोराको विद्युतीय रुपमा स्वःघोषणा गर्न लगाउनुपर्नेछ ।
यस्तै, विद्युतीय वालेटमा रकम लोड गर्दा, एक वालेटबाट अर्कोमा रकमान्तर गर्दा तथा अन्य विद्युतीय कारोबार गर्दा अनिवार्य रुपमा प्रयोजन खुलाउनुपर्ने व्यवस्था गर्नुपर्ने राष्ट्र बैंकले जनाएको छ ।
वि.सं.२०७९ वैशाख १९ सोमवार १५:५७ मा प्रकाशित