काठमाडौं । बुधवार एकैदिन विभिन्न ५ वटा लघुवित्त कम्पनीहरुले चालु आर्थिक वर्ष २०७८/७९ को तेस्रो त्रैमासिक वित्तीय विवरण सार्वजनिक गरेका छन् ।
उक्त दिन महिला लघुवित्त, जीवन विकास लघुवित्त, मानुषी, समता घरेलु र स्वरोजगार लघुवित्त वित्तीय संस्थाले तेस्रो त्रैमासिक वित्तीय विवरण सार्वजनिक गरेका हुन् ।
कुनको वित्तीय प्रगति कस्तो ?
महिला लघुवित्त
महिला लघुवित्तले चालु आवको तेस्रो त्रैमासमा १० करोड २६ हजार रुपैयाँ नाफा गरेको छ ।
जुन गत वर्षको सोही अवधिको तुलनामा भने ५५.७० प्रतिशतले बढी हो । गत वर्षको चैत मसान्तसम्ममा कम्पनीले ६ कराड ४२ लाख ४३ हजार रुपैयाँ नाफा गरेको थियो ।
उक्त अवधिमा कम्पनीको खुद ब्याज आम्दानी पनि २८.८५ प्रतिशतले बढेर २० करोड ६८ लाख ९ हजार रुपैयाँ पुगेको छ ।
चालु आवको नौ महिनामा कम्पनीको संचालन मुनाफामा भने ४८.१४ प्रतिशतले घटेर ४ करोड १० लाख ९४ हजार रुपैयाँ कायम भएको छ ।
कम्पनीको चुक्ता पुँजी १४ करोड ७५ लाख रुपैयाँ रहेको छ । कम्पनीले जगेडा तथा कोषमा भने २५ करोड ७९ हजार रुपैयाँ राखेको छ ।
उक्त अवधिमा कम्पनीको खराब कर्जा २.९७ प्रतिशत पुगेको छ । कम्पनीको प्रतिसेयर आम्दानी ९० रुपैयाँ ४२ पैसा र प्रतिसेयर नेटवर्थ २६९ रुपैयाँ ५५ रुपैयाँ रहेको छ ।
जीवन विकास लघुवित्त
जीवन विकास लघुवित्तले चालु आवको नौ महिनामा ५७ करोड ७५ लाख ९८ हजार रुपैयाँ नाफा गरेको छ ।
कम्पनीको यो नाफा गत वर्षको सोही अवधिको तुलामा भने २.४२ प्रतिशतले मात्र बढी हो । गत वर्षको तेस्रो त्रैमासमा कम्पनीको नाफा ५६ करोड ३९ लाख ३९ हजार रुपैयाँ रहेको थियो ।
चालु आवको तेस्रो त्रैमासमा कम्पनीको खुद ब्याज आम्दानी २०.३८ प्रतिशतले बढेर १ अर्ब २० करोड ६९ लाख ५९ हजार रुपैयाँ पुगेको छ ।
कम्पनीले गत वर्षको तेस्रो त्रैमासमा २९ करोड २९ लाख १५ हजार रुपैयाँ संचालन मुनाफा गरेकोमा यस वर्ष भने ७१.६२ प्रतिशतले बढाएको छ ।
कम्पनीको चुक्ता पुँजी १ अर्ब ३ करोड ४२ लाख ८० हजार रुपैयाँ रहेको छ । कम्पनीे जगेडा तथा कोषमा भने १ अर्ब ३३ करोड ७१ लाख ६ हजार रुपैयाँ राखेको छ ।
कम्पनीको प्रतिसेयर आम्दानी ७४ रुपैयाँ ४६ पैसा र प्रतिसेयर नेटवर्थ २४७ रुपैयाँ ८९ पैसा रहेको छ ।
मानुषी लघुवित्त
मानुषी लघुवित्तले चालु आवको तेस्रो त्रैमासमा १ करोड ८६ लाख ५० हजार रुपैयाँ नाफा कमाएको छ । कम्पनीको नाफा गत वर्षको सोही अवधिको तुलनामा ५५.८८ प्रतिशत वृद्धि भएको हो ।
उक्त अवधिमा कम्पनीको सञ्चालन मुनाफा ५६.८७ प्रतिशतले वृद्धि भई ३ करोड १२ लाख रुपैयाँ पुर्याएको छ ।
कम्पनीको खुद ब्याज आम्दानी १५.९७ प्रतिशत बढेको छ भने कुल सञ्चालन आम्दानी २१ दशमलव ६२ प्रतिशत बढेको छ ।
कम्पनीको चुक्ता पुँजी १० करोड ९३ लाख ७५ हजार रुपैयाँ रहेको छ । कम्पनीले जगेडा तथा कोषमा भने ५ करोड २६ लाख ९६ हजार रुपैयाँ राखेको छ ।
कम्पनीको प्रतिसेयर आम्दानी (वार्षिक) ३४ रुपैयाँ १० रुपैयाँ र प्रतिसेयर नेटवर्थ १४८ रुपैयाँ १८ पैसा रहेको छ ।
समता घरेलु लघुवित्त
समता घरेलु लघुवित्तले चालु आवको चैत मसान्तसम्ममा ५ करोड ३६ लाख ३घ हजार रुपैयाँ नाफा कमाएको छ । जुन गत वर्षको सोही अवधिको तुलनामा १८.७५ प्रतिशतले कमी हो ।
चालु आवको तेस्रो त्रैमासमा कम्पनीको खुद ब्याज आम्दानी भने ३६ प्रतिशत र सञ्चालन नाफा २९ प्रतिशतले वृद्धि भएको छ ।
कम्पनीको चुक्ता पुँजी ३४ करोड २७ लाख ४४ हजार रुपैयाँ रहेको छ । कम्पनीले जगेडा तथा कोषमा भने १६ करोड २४ लाख २२ हजार रुपैयाँ राखेको छ ।
कम्पनीको प्रतिसेयर आम्दानी (वार्षिक) २० रुपैयाँ ८६ पैसा र प्रतिसेयर नेटवर्थ १४७ रुपैयाँ ३९ पैसा रहेको छ ।
स्वरोजगार लघुवित्त
स्वरोजगार लघुवित्तले चालु आवको तेस्रो त्रैमासमा १३ करोड १७ लाख ७२ हजार रुपैयाँ नाफा गरेको छ । कम्पनीको यो नाफा गत वर्षको सोही अवधिको तुलनामा १६.९७ प्रतिशतले बढी हो ।
कम्पनीको खुद ब्याज आम्दानी ३५ प्रतिशत र सञ्चालन नाफा १०९ प्रतिशतले वृद्धि भई क्रमशः ३१ करोड २२ लाख २७ हजार र १८ करोड ४६ लाख ९५ हजार रुपैयाँ पुगेको छ ।
कम्पनीको चुक्ता पुँजी ५१ करोड ४० ९९ हजार रुपैयाँ रहेको छ भने जगेडा तथा कोषमा भने २२ करोड ५१ लाख ५२ हजार रुपैयाँ सञ्चित गरेको छ ।
कम्पनीको प्रतिसेयर आम्दानी ३४ रुपैयाँ १८ पैसा र प्रतिसेयर नेटवर्थ १४३ रुपैयाँ ८० पैसा रहेको छ ।
वि.सं.२०७९ वैशाख २१ बुधवार १४:०६ मा प्रकाशित
