काठमाडौ । आउँदो जेठ १ गतेदेखि लागू हुने गरी नेपाल राष्ट्र बैंकले पनि बैंक तथा वित्तीय संस्थामा शनिबार र आइतबार सार्वजनिक दिने निर्णय गरेको छ ।
राष्ट्र बैंकका गभर्नरको आज अर्थात वैशाख २८ गतेको स्वीकृति बमोजिमा बैंकमा शनिबार र आइतबार सार्वजनिक बिदा दिने निर्णय गरिएको हो ।
यस्तै, सोमबारदेखि शुक्रबारसम्म कार्यालय समय विहान साढे ९ बजेदेखि अपरान्ह साढे ५ बजेसम्म गर्ने तर, कात्र्तिक १६ गतेदेखि माघ १५ गतेसम्म भने कार्यालय समय विहान साढे ९ बजेदेखि अपरान्ह साढे ४ बजेसम्म कायम रहने बैंकले जनाएको छ ।
त्यसैगरि दसैँ र तिहारका सार्वजनिक बिदाबाहेक अन्य बिदा लगातार दुई दिनभन्दा बढी भएमा तेस्रो दिनदेखि बैंक विभाग र मुद्रा व्यवस्थापन विभाग (टक्सार महाशाखासमेत) बाट प्रवाह हुने सेवा, भुक्तानी प्रणाली विभागबाट हुने आटीजीएस सेवा, मौद्रिक व्यवस्थापन विभागबाट हुने सेवालगायत अन्य अत्यावश्यक सेवा तथा प्रदेशस्थित कार्यायको अत्यावश्यकीय बैंकिङ सेवालाई नियमित गर्न सीमित संख्यामा कर्मचारीलाई खटाई निर्धारित कार्यालय समयसम्म सञ्चालन गर्नुपर्ने पनि राष्ट्र बैंकले निर्देशन दिएको छ ।
त्यस्ता सेवा सञ्चालनमा सहयोग गर्न सूचना प्रविधि विभागले आवश्यक परेमा आवश्यकताअनुसार कर्मचारी खटाउन पनि निर्देशन दिइएको छ ।
अन्य विस्तृतका लागि हेर्नुहोस्, सूचना
वि.सं.२०७९ वैशाख २८ बुधवार १६:१३ मा प्रकाशित