काठमाडौं । नेपाल स्टक एक्सचेञ्ज (नेप्से) मा थप तीन कम्पनीको १ करोड ९९ लाख ८५ हजार कित्ता बढी सेयर सूचीकृत भएको छ ।
यस साता नेप्सेमा दुई कम्पनीको हकप्रद सेयर र एक कम्पनीको बोनस सेयर सूचीकृत भएको हो ।
नेप्सेमा सोमबार आईएमई जनरल इन्स्योरेन्स कम्पनीको ४६ लाख ३० हजार ३४४ कित्ता हकप्रद सेयर सूचीकृत भएको छ । कम्पनीले ४० प्रतिशत हकप्रद बापतको उक्त सेयर नेप्सेमा सूचीकृत गराएको हो ।
यस्तै, बिहीबार नेपाल लाइफ इन्स्योरेन्स कम्पनीको १४ प्रतिशत बोनस सेयर नेप्सेमा सूचीकृत भएको छ । कम्पनीले गत चैत २१ गते सम्पन्न वार्षिक साधारण सभाबाट पारित १४ प्रतिशत बापतको १ करोड ७९ हजार ९५८ कित्ता बोनस सेयर नेप्सेमा सूचीकृत गराएको हो ।
त्यसैगरि यस साता अर्थात शुक्रबार शिखर इन्स्योरेन्स कम्पनीको ३० प्रतिशत बापतको हकप्रद सेयर नेप्सेमा सूचीकृत भएको छ । उक्त दिन कम्पनीको ५२ लाख ७५ हजार ५७२ कित्ता हकप्रद सेयर नेप्सेमा सूचीकृत भएको हो ।
यी तीनै वटा कम्पनीहरुको सेयर अब सम्वन्धित सेयरधनीहरुका हितग्राही खातामा आएपछि कारोबार गर्न सक्नेछन् ।
वि.सं.२०७९ जेठ २७ शुक्रवार १६:५८ मा प्रकाशित
