काठमाडौं । ङादी ग्रुप पावरले हकप्रद सेयर जारी गर्ने भएको छ । कम्पनीले आउँदो साउन १८ गतेदेखि १५० प्रतिशत हकप्रद सेयर निष्काशन गर्ने भएको हो ।
कम्पनीले हाल कायम चुक्ता पूँजीको आधारमा १ बराबर १ दशमलव ५ को अनुपातमा हकप्रद सेयर जारी गर्न लागेको हो ।
जस अनुसार कम्पनीले १०० रूपैयाँ अंकित दरका १ अर्ब ६ करोड ३ लाख ९८ हजार ६०० रूपैयाँ बराबरको १ करोड ६ लाख ३ हजार ९८६ कित्ता हकप्रद सेयर निष्काशन गर्नेछ ।
हकप्रद शेयर निष्काशन प्रयोजनका लागि कम्पनीले असार २० गते एक दिन बुक क्लोज गर्ने भएको छ । असार १९ गतेसम्म सेयर कायम रहेका सदस्यहरूले मात्र आवेदन दिन सक्नेछन् । उक्त हकप्रद सेयरमा भदौ ७ गतेसम्म आवेदन दिन सकिने कम्पनीले जनाएको छ ।
कम्पनीको हकप्रद सेयर निष्काशन तथा बिक्री प्रबन्धकमा सिद्धार्थ क्यापिटल लिमिटेड रहेको छ ।
वि.सं.२०७९ साउन १ आइतवार १०:०७ मा प्रकाशित