काठमाडौं । करिब डेढ दर्जन वाणिज्य बैंकहरुले गत आर्थिक वर्ष २०७८/७९ को चौंथौ त्रैमासिक वित्तीय विवरण सार्वजनिक गरेका छन् ।
हालसम्म संचालनमा रहेका मध्ये १७ वटा वाणिज्य बैंकहरुले गत आवको चौंथो त्रैमासिक वित्तीय विवरण सार्वजनिक गरेका हुन् ।
२६ वटा वाणिज्य बैंकहरुमध्ये हालसम्म एनआईसी एशिया बैंक, ग्लोबल आईएमई बैंक, प्रभु, सनराइज, माछापुच्छ्रे, सिटिजन्स, लक्ष्मी, सानिमा, एनसीसी बैंक, स्टयाण्डर्ड चार्टर्ड, एभरेष्ट बैंक, हिमालयन, कुमारी, सिद्धार्थ र नेपाल एसबि आई बैंकले गत आवको असार मसान्सम्मको वित्तीय विवरण सार्वजनिक गरेका हुन् ।
गत आवमा यी बैंकहरुले ४७ अर्ब ५७ करोड २९ लाख १५ हजार रुपैयाँ नाफा कमाएका छन् । बैंकहरुको यो नाफा अघिल्लो आवको चौंथो त्रैमासको तुलनामा भने २५.१५ प्रतिशतले बढी हो । अघिल्लो आवको सोही अवधिमा तुलनामा यी बैंकहरुले ३८ अर्ब १ करोड २० लाख ३३ हजार रुपैयाँ नाफा कमाएका थिए ।
गत आवको असार मसान्तसम्ममा सबैभन्दा बढी नाफा वृद्धि गर्नेमा नेपाल एसबिआई बैंकको रहेको छ । बैंकले गत आवमा ७०.३ प्रतिशतले नाफा वृद्धि गरि १ अर्ब ६३ करोड ८२ लाख ८४ हजार रुपैयाँ पुर्याएको छ । बैंकले अघिल्लो आवको सोही अवधिमा भने ९६ करोड ३४ लाख ७९ हजार रुपैयाँ मात्र नाफा कमाएको थियो ।
सबैभन्दा बढी नाफा वृद्धि गर्नेको दोस्रो स्थानमा रहेको स्टायाण्डर्ड चार्टर्ड बैंकले गत आवमा २ अर्ब २६ करोड ९८ लाख ५५ हजार रुपैयाँ कमाएको छ । जुन अघिल्ले आवको चौंथो त्रैमासको तुलनामा ६२.२६ प्रतिशतले बढी हो । बैंकले अघिल्लो आवको असार मसान्तमा भने १ अर्ब ७७ करोड ९ लाख ३९ हजार रुपैयाँ नाफा कमाएको थियो ।
गत आवको असार मसान्तसम्मा नेपाल क्रेडिट एण्ड कमर्श (एनसीसी) बैंकले २ अर्ब २ करोड ३३ लाख २२ हजार रुपैयाँ नाफा कमाएको छ । जुन अघिल्लो आवको सोही अवधिमा तुलनामा ५१.९७ प्रतिशतले बढी हो ।
उक्त अवधिमा प्रभु बैंकले पनि गत आवमा ५१.१० प्रतिशत बढाएर २ अर्ब ६० करोड ३ लाख ९६ हजार रुपैयाँ पुर्याएको छ ।
यस्तै, उक्त अवधिमा सबैभन्दा बढी नाफा कमाउनेमा भने ग्लोबल आइएमई बैंक पहिलो स्थानमा देखिएको छ । बैंकले गत आवमा ५ अर्ब २० करोड ६४ लाख ५५ हजार रुपैयाँ नाफा कमाएको छ । बैंकको यो नाफा अघिल्लो वर्षको तुलनामा भने २५ प्रतिशतले बढी हो ।
गत आवमा नाफा बढी कमाउनेको दोस्रो स्थानमा एनआईसी एशिया बैंक रहेको छ । गत आवको असार मसान्तसम्मा बैंकको नाफा ३८.८६ प्रतिशतले बढेर ४ अर्ब ५२ करोड ५४ लाख २२ हजार रुपैयाँ पुगेको छ ।
यता, गत आवको असार मसान्तसम्म सनराइज बैंकले पनि ४८.६९ प्रतिशतले नाफा बढाएर २ अर्ब १५ करोड ९ लाख ४४ हजार रुपैयाँ पुर्याएको छ भने एभरेष्ट बैंकले ४३.७७ प्रीतशतले बढाएर २ अर्ब ५४ करोड ६० लाख ५९ हजार रुपैयाँ पुर्याएको छ ।
त्यसैगरि उक्त अवधिमा कुमारी बैंकको नाफा पनि ४३.८६ प्रतिशतले वृद्धि भई २ अर्ब ८३ करोड ५२ लाख ३४ हजार रुपैयाँ पुगेको छ ।
उक्त अवधिमा माछापुच्छ्रे बैंकले २ अर्ब १६ करोड ९ लाख, सिटिजन्स बैंकले २ अर्ब २५ करोड ११ लाख ७१ हजार, सिद्धार्थ बैंकले ३ अर्ब २१ करोड ९७ लाख ४१ हजार, प्राइम बैंकले ३ अर्ब ६८ करोड १२ लाख ३२ हजार र लक्ष्मी बैंकले १ अर्ब ६० करोड ३५ लाख ७१ हजार रुपैयाँ नाफा कमाएका छन् । यी बैंकहरुको नाफा क्रमशः ३४.४२ प्रतिशत, २४.७६ प्रतिशत, १२.७८, १२.६३ प्रतिशत र १.७६ प्रतिशतले वृद्धि भएको हो ।
गत आवको चौंथो त्रैमासमा सानिमा बैंकको नाफामा भने झिनो गिरावट देखिएको छ । गत आवको असार मसान्तमा बैंकको नाफा १.०७ प्रतिशतले घटेर २ अर्ब २९ करोड २९ लाख ९ हजार रुपैयाँ कायम भएको छ । बैंकले अघिल्लो आवमा बैंकको नाफा २ अर्ब ३१ करोड ७८ लाख २१ हजार रुपैयाँ रहेको थियो ।
वि.सं.२०७९ साउन १८ बुधवार १४:४७ मा प्रकाशित