काठमाडौं । बिमा समितिका अध्यक्ष सूर्य प्रसाद सिलवालले समितिले तोकेको समयसीमाभित्र पुँजी वृद्धि नगर्ने बिमा कम्पनीहरुको कारोबार रोक्का गर्ने बताएका छन् ।
राष्ट्रिय बिमा कम्पनी नवौं वर्षमा प्रवेश गरेको अवसरमा आयोजित कार्यक्रममा बोल्दै सिलवालले समितिले निर्देशन दिए अनुसार पुँजी नपुर्याए कारोबार रोक्का गरिने बताएका हुन् ।
तोकिएको समयसीमाभित्र पुँजी नपुर्याउने सरकारी र निजी क्षेत्रको जुन सुकै कम्पनीलाई पनि कानुनी दायरामा ल्याउने सिलवालको भनाई छ ।
सिलवालले प्रतिष्पर्धात्मक एवं ग्राहकमुखी बिमा सेवा उपलब्ध गराउन पनि बिमा कम्पनीलाई सुझाव दिएका छन् ।
बिमा कम्पनीका अध्यक्ष राजेश्वर ज्ञवालीले नियामक निकायबाट हालसम्म (आ.व. २०६८र६९ देखि आ.व. २०७२/७३ सम्मको) स्वीकृत वित्तीय विवरणको वार्षिक साधारण सभा यथाशीघ्र गर्ने लक्ष्य लिइएको जानकारी गराएका छन् ।
साथै, पछिल्ला आर्थिक वर्षहरुका वित्तीय विवरण पनि यसै आर्थिक वर्षभित्र तयार गरी वार्षिक साधारण सभा गर्ने लक्ष्य लिएको जानकारी गराए ।
यस्तै, राष्ट्रिय बिमा कम्पनीका प्रमुख कार्यकारी अधिकृत ज्ञानेन्द्रराज ओझाले कम्पनीको लगानीका हिसाबले ऋणपत्र, सेयर र डिबेन्चरमा बढी रहेको देखिएको जानकारी गराएका छन् ।
उनले हालसम्म नेपाल सरकार, बिमा समिति तथा नेपाल राष्ट्र बैंकद्वारा निर्दिष्ट गरिएका क्षेत्रहरुमा तथा विभिन्न बैंक, वित्तीय संस्था, नेपाल सरकारको ऋणपत्र, सेयर र डिबेञ्चरमा अल्पकालिन तथा दीर्घकालिन लगानी गरी कम्पनीले उच्चतम प्रतिफल प्राप्त गर्दै आएको जानकारी गराए ।
वि.सं.२०७९ साउन १९ बिहीवार १६:३१ मा प्रकाशित
