काठमाडौं । राष्ट्रिय स्तरका विकास बैंकहरुले धमाधम गत आर्थिक वर्ष २०७८/७९ को चौंथो त्रैमासिक वित्तीय विवरण सार्वजनिक गरेका छन् ।
हालसम्म पाँच वटा राष्ट्रिय विकास बैंकहरुले गत आवको चौंथो त्रैमासिक वित्तीय विवरण प्रकाशित गरेका हुन् । जसमध्ये शाइन रेसुङ्गा डेभलपमेन्ट बैंक, लुम्बिनी विकास बैंक, मुक्तिनाथ, सांग्रिला डेभलपमेन्ट र गरिमा विकास बैंक रहेका छन् ।
यी बैंकहरुले गत आवमा ४ अर्ब ७७ करोड ८९ लाख २८ हजार रुपैयाँ नाफा कमाएका छन् । जुन अघिल्लो आवको सोही अवधिको तुलनामा भने यी बैंकहरुको नाफा २९.४६ प्रतिशतले बढी हो । अघिल्लो आवमा बैंकहरुले ३ अर्ब ६९ करोड १४ लाख ३७ हजार रुपैयाँ नाफा कमाएका थिए ।
उक्त अवधिमा हालसम्म दुई बैंक अर्ब क्लबमा प्रवेश गरेका छन् । गत आवमा गरिमा विकास बैंक र मुक्तिनाथ विकास बैंकले अर्ब बढी नाफा कमाएका हुन् ।
गत आवमा गरिमा विकास बैंकले १ अर्ब ४९ करोड २१ लाख ६७ हजार रुपैयाँ र मुक्तिनाथ विकास बैंकले १ अर्ब ३७ करोड २५ हजार रुपैयाँ नाफा कमाएका छन् । यी दुवै बैंकको नाफा अघिल्लो आवको सोही अवधिको तुलनामा क्रमशः २५.६८ प्रतिशत र १८.४६ प्रतिशतले बढी हो ।
गत आवमा लुम्बिनी विकास बैंकले नाफामा छलाङ मारेको छ । उक्त अवधिमा बैंकले ६७ करोड ५६ लाख ३२ हजार रुपैयाँ नाफा कमाएको हो । जुन अघिल्लो आवको सोही अवधिको तुलनामा ५५.६८ प्रतिशतले बढी हो । अघिल्लो आवमा बैंकको नाफा ४३ करोड ३९ लाख ६७ हजार रुपैयाँ मात्र रहेको थियो ।
गत आवमा शाइन रेसुङ्गा डेभलपमेन्ट बैंकको नाफा २८.१० प्रतिशतले वृद्धि भई ६४ करोड ५२ लाख ८९ हजार रुपैयाँ पुगेको छ । अघिल्लो आवको सोही अवधिमा बैंकको नाफा ५० करोड ३७ लाख २१ हजार रुपैयाँ नाफा कमाएको थियो ।
यस्तै, गत आवमा सांग्रिला डेभलपमेन्ट बैंकले ५९ करोड ५८ लाख १५ हजार रुपैयाँ नाफा कमाएको छ । जुन अघिल्लो आवको सोही अवधिको तुलनामा ४५.२९ प्रतिशतले बढी हो । अघिल्लो आवको चौंथो त्रैमासमा बैंकले ४१ करोड रुपैयाँ नाफा आर्जन गरेको हो ।
वि.सं.२०७९ साउन २० शुक्रवार १२:२६ मा प्रकाशित