काठमाडौं । माइक्रोफाइनान्स कम्पनीहरुले धमाधम गत आर्थिक वर्ष २०७८/७९ को चौंथो त्रैमासिक वित्तीय विवरण सार्वजनिक गर्न थालेका छन् ।
संचालनमा रहेकामध्ये हालसम्म ३२ वटा माइक्रोफाइनान्सले गत आवको चौंथो त्रैमासिक वित्तीय विवरण सार्वजनिक गरेका हुन् । उक्त अवधिमा यी कम्पनीहरुको नाफा सामान्य वृद्धि भएको छ ।
गत आवमा ३२ वटा लघुवित्त कम्पनीहरुले ५ अर्ब ९५ करोड ६१ लाख ६३ हजार रुपैयाँ नाफा कमाएका छन् । कम्पनीहरुको यो नाफा अघिल्लो आवको सोही अवधिको तुलनामा भने १०.१८ प्रतिशतले मात्र बढी हो । अघिल्लो आवमा कम्पनीहरुले ५ अर्ब ४० करोड ५४ लाख १३ हजार रुपैयाँ नाफा गरेका थिए ।
उक्त अवधिमा पाँच कम्पनीको नाफामा छलाङ मारेका छन् भने ११ वटा कम्पनीहरुको नाफामा गिरावट आएको छ ।
गत आवमा आरएमडी लघुवित्त, फस्र्ट माइक्रोफाइनान्स लघुवित्त, नेष्डो समृद्धि, महिला लघुवित्त र सिवाईसी लघुवित्तको नाफामा उछाल आएको छ ।
गत आवमा सबैभन्दा बढी नाफा आरएमडीसी लघुवित्तले वृद्धि गरेको छ । उक्त अवधिमा कम्पनीको नाफा ९९.४७ प्रतिशतले बढेर ३५ करोड ४९ लाख ८ हजार रुपैयाँ पुगेको छ ।
गत आवमा फस्र्ट माइक्रोफाइनान्सको नाफा ८७.८१ प्रतिशतले बढेर २६ करोड ८८ लाख ८३ हजार, नेष्डो समृद्धिको ७१.०५ प्रतिशतले बढेर २२ करोड १९ लाख ५० हजार, महिला लघुवित्तको ६१.४२ प्रतिशतले वृद्धि भई १५ करोड ९९ हजार, र सिवाईसी लघुवित्तको ५५.०७ प्रतिशतले नाफा वृद्धि भई ८ करोड ३ लाख २९ हजार रुपैयाँ पुगेको छ ।
गत आवमा सबैभन्दा बढी गणपति लघुवित्त वित्तीय संस्थाको नाफा घटेको छ । अघिल्लो आवमा ४ करोड ११ लाख ३८ हजार रुपैयाँ नाफा गरेकोे कम्पनीको गत आवमा भने ५४.७४ प्रतिशतले गिरावट आएको छ ।
यस्तै, गत आवमा गुराँस लघुवित्तको नाफा ४२.२२ प्रतिशतले घटेर १ करोड २७ लाख ४७ हजार, सर्पोट लघुवित्तको ३४.९५ प्रतिशतले घटेर २ करोड १० लाख १३ हजार, श्रृजनशील लघुवित्तको नाफा पनि ३४.६२ प्रतिशतले घटेर ४ करोड २९ लाख ७५ हजार, रुपैयाँ कायम भएको छ ।
त्यसैगरि गत आवमा छिमेक लघुवित्तको २१.४३ प्रतिशत, नाडेप लघुवित्तको नाफा २८.९६ प्रतिशत, आरम्भ लघुवित्तको २७.७७ प्रतिशत, उपकार लघुवित्तको २७.१३, सूर्योदय लघुवित्तको १३.०१, जाल्पा सामुदायिकको ४.६६ प्रतिशतले नाफामा गिरावट आएको छ ।
कुनको नाफा कति ?
वि.सं.२०७९ साउन २० शुक्रवार १७:०३ मा प्रकाशित