काठमाडौं । सयपत्री हाइड्रोपावर कम्पनीको आईपीओ गत साउन २४ गते मंगलबार बाँडफाँड भएको छ ।
कम्पनीको आईपीओ बिक्री प्रबन्धक एनआइबीएल एस क्यापिटलको कार्यालयमा बाँडफाँड भएको हो ।
कम्पनीको आईपीओमा माग भन्दा बढी आवेदन परेकाले आईपीओ गोलाप्रथाबाट वितरण भएको थियो ।
गोलाप्रथाबाट ६७ हजार ५८ जना आवेदकले १० कित्ताका दरले सेयर पाएका छन् । जसमध्ये ६ जना आवेदकले थप १ कित्ता अर्थात ११ कित्ता दरले सेयर पाएका हुन । बाँकी साढे १५ लाख आवेदकको हात खाली भएको छ ।
सीडीएस एण्ड क्लियरिङ लिमिटेडका अनुसार कम्पनीको आईपीओमा आवेदन दिने अन्तिम दिनसम्ममा १५ लाख बढीले आवेदन दिएका थिए ।
कम्पनीको आईपीओमा १५ लाख २३ हजार ७०३ जनाले १ करोड ७२ लाख ४५ हजार ८० कित्ता सेयरका लागि आवेदन दिएका छन् । यो मागभन्दा २५.२२ गुणा बढी हो ।
हाल कम्पनीको सेयर नेपाल स्टक एक्सचेञ्ज (नेप्से) मा सूचीकरणका प्रक्रियामा छ । कम्पनीको आईपीओले पहिलो कारोबारका लागि ६४ रुपैयाँ ९६ पैसादेखि १९४ रुपैयाँ ८८ पैसासम्म ओपन रेञ्ज पाउने देखिएइको छ । कम्पनीको आर्थिक वर्ष २०७७/७८ को वास्तिविक प्रतिसेयर नेवटर्थ ६४ रुपैयाँ ९६ पैसा रहेको छ । नेप्सेले कम्पनीको पहिलो कारोबारका लागि प्रतिसेयर नेटवर्थको तीन गुणासम्म मूल्य रेञ्न तोक्ने गर्दछ । जसको आधारमा कम्पनीको आईपीओले पहिलो कारोबारका लागि ६४ रुपैयाँ ९६ पैसादेखि १९४ रुपैयाँ ८८ पैसासम्म ओपन रेञ्ज पाउने देखिएको हो ।
कम्पनीले साउन १३ गतेदेखि सर्वसाधारणका लागि आईपीओ जारी गरेको थियो ।
कम्पनीले आयोजना प्रभावित स्थानीयले नकिनेको १ लाख २१ हजार ६० कित्तासमेत थप गरी कुल ७ लाख २१ हजार ६० कित्ता सेयर निष्काशन गरेको हो ।
यसमध्ये ५ प्रतिशत अर्थात ३६ हजार ५३ कित्ता सेयर समूहिक लगानी कोष र २ प्रतिशत अर्थात १४ हजार ४२१ कित्ता सेयर कम्पनीका कर्मचारीहरुका लागि छुट्याइएको छ । बाँकी ६ लाख ७० हजार ५८३ कित्ता सेयरमा सर्वसाधारणले आवेदन दिनसक्ने व्यवस्था गरेको थियो ।
वि.सं.२०७९ साउन २९ आइतवार १४:३७ मा प्रकाशित