काठमाडौं । निर्जीबन बीमा कम्पनीहरुले धमाधम गत आर्थिक वर्ष २०७८/७९ को चौंथो त्रैमासिक वित्तीय विवरण सार्वजनिक गरिरहेका छन् ।
हालसम्म संचालनमा रहेका मध्ये १७ वटा निर्जीबन बीमा कम्पनीहरुले गत आवका चौंथो त्रैमासिक रिर्पोट प्रकाशित गरेका हुन् ।
गत आवमा कम्पनीहरुले ४ अर्ब ५३ करोड ६६ लाख २० हजार रुपैयाँ नाफा गरेका हुन् । कम्पनीहरुको यो नाफा अघिल्लो आवको सोही अवधिको तुलनामा भने ८.४४ प्रतिशतले मात्र बढी हो । अघिल्लो आवमा कम्पनीहरुको नाफा ४ अर्ब १८ करोड ३५ लाख १६ हजार रुपैयाँ रहेको थियो ।
गत आवमा सानिमा जनरल इन्स्योरेन्सले नाफामा छलाङ्ग मारेको छ । उक्त अवधिमा कम्पनीको नाफा ९८.६४ प्रतशितले वृद्धि भई १४ करोड ४९ लाख ५ हजार रुपैयाँ पुगेको छ । अघिल्लो आवमा कम्पनीको नाफा ७ करोड २९ लाख ४७ हजार रुपैयाँ रहेको थियो ।
गत आवमा सबैभन्दा बढी नाफा नेको इन्स्योरेन्सले कमाएको छ । उक्त अवधिमा कम्पनीको नाफा ९ प्रतिशतले वृद्धि भई ५५ करोड १ लाख २८ हजार रुपैयाँ पुगेको छ ।
यस्तै, सबैभन्दा धेरै नाफा कमाउने वृद्धि गर्नेको दोस्रो स्थनामा शिखर इन्स्योरेन्स रहेको छ । कम्नपीले गत आवमा ५२ करोड ६१ लाख ७६ हजार रुपैयाँ नाफा आर्जन गरेको छ । कम्पनीको नाफा अघिल्लो आवको तुलनामा भने ५६.५४ प्रतिशतले बढी हो ।
गत आवमा पाँच कम्पनीको नाफामा गिरावट आएको छ । अघिल्लो आवको तुलनामा हिमालयन एभरेष्टको ५९.६१ प्रतिशत, आइएमई जनरलको नाफा २३.२२ प्रतिशत, सगरमाथाको ८.७१, शिद्धार्थको ८.३१ र प्रिमियर इन्स्योरेन्सको नाफा ३.५४ प्रतिशतले घटेको छ ।
गत आवमा सबैभन्दा कम नाफा अजोड इन्स्योरेन्स कम्पनीले गरेको छ । उक्त अवधिमा कम्पनीले ११ करोड ८९ लाख ५६ हजार रुपैयाँ नाफा कमाएको छ । जुन अघिल्लो आवको सोही अवधिको तुलनामा भने १६.६१ प्रतिशतले बढी हो ।
यस्तै, गत आवमा प्रभु इन्स्योरेन्सको नाफा झिनो सुधार(१.८८ प्रतिशतले वृद्धि ) भएको छ । उक्त अवधिमा कम्पनीले २३ करोड ७६ लाख ४५ हजार रुपैयाँ नाफा गरेको हो ।
त्यसैगरि गत आवमा युनाईटेड इन्स्योरेन्सको ३२.५८ प्रतिशत, राष्ट्रिय बीमा कम्पनीको नाफा ३१.४० प्रतिशत, प्रुडेन्सियल इन्स्योरेन्सको ३१.२७ प्रतिशत, जनरल इन्स्योन्सको २४.५०, लुम्बिनी जनरलको १५.७६, एनएलजीको १४.०४ र नेपाल इन्स्योरेन्सको नाफा ७.३३ प्रतिशतले वृद्धि भएको छ ।
वि.सं.२०७९ भदौ १ बुधवार १७:०७ मा प्रकाशित
