काठमाडौं । सोल्टी होटल लिमिटेडले सवा ३० करोड बढी नाफा कमाएको छ ।
होटेलले शुक्रबार प्रकाशित गरेको गत आर्थिक वर्ष २०७८/७९ चौंथो त्रैमासिक वित्तीय विवरणले यस्तो देखाएको हो ।
गत आवमा होटेलले ३० करोड १६ लाख ३१ हजार रुपैयाँ नाफा गरेको छ । अघिल्लो आवको सोही अवधिमा २२ करोड ४९ लाख ३३ हजार रुपैयाँ नोक्सानीमा रहेको होटेलले गत आवमा भने खुद नाफा उल्लेख्य वृद्धि गरेको हो ।
गत आवमा कम्पनीको कुल आम्दानी उख्लेख्य मात्रामा बढेकाले खुद नाफामा सुधार आएको छ । उक्त अवधिमा कम्पनीको कुल आम्दानी २०२ प्रतिशतले वृद्धि भई १ अर्ब ३७ करोड १५ लाख ९६ हजार रुपैयाँ पुगेको छ ।
यस्तै, अघिल्लो आवमा १७ करोड २४ लाख ९२ हजार रुपैयाँ ऋणात्मक रहेको कम्पनीको संचालन नाफा पनि गत आवमा भने ३१ करोड ९५ लाख ७५ हजार रुपैयाँ धनात्मक देखिएको छ ।
कम्पनीको चुक्ता पुँजी ८४ करोड २५ लाख ७९ हजार रुपैयाँ रहेको छ । कम्पनीले जगेडा तथा कोषमा भने ८९ करोड १२ लाख ९५ हजार रुपैयाँ राखेको छ ।
गत आवमा कम्पनीको प्रतिसेयर आम्दानी ३ रुपैयाँ ५८ पैसा र प्रतिसेयर नेटवर्थ २० रुपैयाँ ५८ पैसा कायम भएको छ ।
वि.सं.२०७९ भदौ ३ शुक्रवार १२:५३ मा प्रकाशित
