काठमाडौं । बैंकहरुले कात्तिकमा पनि असोज महिनाकै ब्याजदरलाई निरन्तरता दिएका छन् । जसअनुसार बैंकहरुले कात्तिकको लागि व्यक्तिगत मुद्दति निक्षेपमा १२.१३ प्रतिशत ब्याजदर प्रकाशित गरेका छन् ।
यसैगरी, रेमिट्यान्स मुद्दतिमा १३.१३ प्रतिशत देखि १५.१३३ प्रतिशत ब्याजदर प्रकाशित गरेका छन् । भदौसम्म व्यक्तिगत मुद्दति ११.०३ प्रतिशत र संस्थागतमा ९.०३ प्रतिशत थियो । उक्त ब्याजदर असोजमा बढाएर १२.१३३ प्रतिशत र १०.१३३ प्रतिशत पुर्याएका थिए ।
त्रैमासको अन्तिम महिनामा निक्षेपको ब्याजदर बढेकाले कात्तिक महिनामा कर्जाको ब्याजदर बढ्ने भएको हो ।
निक्षेपको ब्याजदर महिनैपिच्छे घटबढ गर्न पाइने राष्ट्र बैंकको नियम भए पनि कर्जाको ब्याजदर भने प्रत्येक ३ महिनामा रिभ्यु गर्न सकिने प्रावधान छ । सोही बमोजिम चालु आर्थिक वर्षको पहिलो ३ महिना आज सोमबारबाट सकिँदैछ । त्यसैले मंगलबारबाटै लागू हुने गरी बैंकहरुले नयाँ ब्याजदर निर्धारण गरेका छन् ।
बैंकहरुले आधार दरमा प्रिमियम थपेर ब्याज निर्धारण गर्ने गरेका छन् । अहिले बैंकहरुको आधार दर नै १० प्रतिशत भन्दा बढी छ । निक्षेपको ब्याज बढेसँगै आधार दर पनि बढ्ने गरेको छ । जसअनुसार कात्तिक महिनामा बैंकहरुको आधार आधार दर ११ प्रतिशत भन्दा माथि जानेछ ।
आधार दर बढेपछि ऋणको ब्याज स्वतः बढ्छ । यसले कात्तिकबाट नयाँ कर्जा मात्रै होइन, पुरानो कर्जा समेत महँगिने भएको छ । बैंकहरुले आधार दर बढेसँगै पूराना ऋणीको ब्याजदर पनि बढाउँदै आएका छन् ।
वि.सं.२०७९ असोज ३१ सोमवार २०:४७ मा प्रकाशित