बारा । आगामी ४ मंसिरमा हुने निर्वाचनमा बारा प्रदेशसभा १ (क) मा नेकपा एमालेबाट त्रिलोकीप्रसाद चौधरी, लोकतान्त्रिक बाम गठबन्धनबाट कांग्रेसका रमेश दंगाल, राष्ट्रिय प्रजातन्त्र पार्टीबाट लक्ष्मी शाह कलवार, स्वतन्त्रका शिवनारायण थारु र एकबहादुर क्षेष्ठबिचच पाँच पक्षीय प्रतिस्पर्धा हुने देखिएकाे छ ।
०७४ सालमा एमाले र माओवादी केन्द्रबीच गठबन्धन हुँदा यस क्षेत्रमा एमालेका त्रिलेकीले जितेका थिए । गत निर्वाचनमा एमालेको साथमा रहेको माओवादी केन्द्रले कांग्रेसले साथ दिएको छ भने एमालेलाई जसपाको साथ छ ।
वैशाख ०७९ मा सम्पन्न स्थानीय निर्वाचनमा एमालेले प्राप्त गरेको मतका आधार हेर्दा माओवादीसँगै नरहदा समेत यस प्रदेशसभामा एमाले बलियो देखिएको छ । साथमा जसपा पनि हुँदा एमालेकाे पल्ला भारी भएकाे हाे ।
वैशाख ०७९ मा सम्पन्न स्थानीय निर्वाचनमा एमालेले पाएको मत हेर्ने हो भने एमाले सत्ता गठबन्धनभन्दा करिब एक हजार मतले अगाडी छ । स्थानीय निर्वाचनको मत परिणामलाई तुलना गर्दा बाराको प्रदेशसभा १ (क) मा सत्ता गठबन्धनलाई जितको लागी निकै चुनौती छ ।
एमालेका मधेश प्रदेश सदस्य समेत रहेका एकबहादुर क्षेष्ठले एमाले परित्याग गरी स्वतन्त्र उम्मेदवर बनेका छन् ।
एमालेका शिवनारायण थारुले पनि एमाले परित्याग गरी स्वतन्त्र उम्मेदवर बनेका छन् । उनले आफू यस क्षेत्रको विकासको निम्ती रणनीतिक र योजनाबद्ध रुपमा आएकाे बताएका छन् ।
सत्ता गठबन्धनबाट कांग्रेसका उम्मेदवार रमेश दंगाल पनि आफूले जित्ने पक्का रहेकाे बताइरहेका छन् । लामो समय काठमाडौंमा बसेर व्यापार गर्दै आएका दंगालले कांग्रेसभित्रैका शम्भुबहादुर बुढाथोकी र सुरेशकुमार खनालको दाबी गरिरहेकाे बारा-१ (क) काे प्रदेश सभाको प्रत्यक्षतर्फकाे टिकट उम्काएका थिए । यहाँका मतदातासँग उनकाे खासै चिनजान समेत नरहेकाे आराेप छ । दंगाल कांग्रेससँगै रहेका सत्तारुढ गठबन्धनका माओवादी, एकीकृत समाजवादी र लोसपाका नेता–कार्यकर्ताको भरमा चुनावमा हाेम्मिएको छन् ।
उनले आफुसँग विकासको माष्टर प्लान रहेको बताएका छन् तर माष्टर प्लानमा के के छन् त्यो भने उनले खुलाएका छैनन् । भुगोलबारे प्रष्ट जानकार नहुँदा उनी यस क्षेत्रका समस्याका बारेमा समेत जानकार छैनन् । केही समय अगाडी दंगाल अखाद्य तेल बिक्री वितरण गरेको भन्दै जिल्ला अदालत बाराको आदेशमा एक लाख धराैटी बुझाएर रिहा भएका थिए । दंगालको सञ्चालक रहेको ईशा सप्लायर्सको गोदामबाट भारतीय कम्पनी ‘सदाबहार’ ब्रान्डको म्याद नाघेको रिफाइन सोयबिन तेल बरामद गरेपछि सञ्चालक दंगाललाई नियन्त्रणमा लिएर गोदाम घरमा पनि सिलबन्दी गरेको थियो । खाद्य प्रयोगशालाको रिपोर्टको आधारमा अखाद्य प्रमाणितपछि तेल नष्ट गरिएको थियो ।
यस्तै, राष्ट्रिय प्रजातन्त्र पार्टीबाट लक्ष्मी शाह कलवार अर्का बलिया प्रतिस्पधिका रुपमा देखा परेका छन् । उनले उर्जाशिल समय बाराको विकास गर्न साथ दिन मतदातालाई आग्रह गरेको र मतदाताले समेत उनलाई साथ दिएमा धोका नदिने बताए ।
यस्तै, एमालेका त्रिलोकीप्रसाद चौधरी अर्का बलिया प्रतिस्पर्धी हुन । यसअगि समेत यस बारा-१ (क) मा विजयी भएका चौधरी पुनः जित हात पार्नेमा ढुक्क रहेको बताउँछन् । उनले शिक्षाका समस्याहरूलाई व्यवस्थापन गर्दै गुणस्तरीय शिक्षा बनाउन पूर्वाधार विकासमा प्राथमिकता दिँदै युवाहरू इमान्दर युवा सिपयुक्त र स्वास्थ्य सेवामा प्रतिबद्ध रहने बताए ।
बाराको प्रदेशसभा १ (क) मा मुख्य प्रतिस्पर्धी दलको रुपमा एमाले र सत्ता गठबन्धन दल रहेका छन् तर अन्य दल र स्वतन्त्र उम्मेदवरका कारण यस क्षेत्रमा मा पाँच पक्षीय प्रतिस्पर्धा हुने देखिएको छ ।
यस प्रदेशसभामा चार स्वतन्त्रसहित १० जना चुनावी मैदानमा रहेका छन् ।
वि.सं.२०७९ कात्तिक २९ मंगलवार १३:२१ मा प्रकाशित
