काठमाडौं । थप दुई बैंक सहित तीन कम्पनीहरुले लाभांश घोषणा गरेका छन् । नेपाल एसबिआई बैंक, सेञ्चुरी कमर्सियल बैंक र आई.सि.एफ.सि फाइनान्स लिमिटेडले लाभांश घोषणा गरेका हुन् ।
नेपाल एसबीआई बैंक
नेपाल एसबीआई बैंक बैंकले गत आर्थिक वर्षको नाफाबाट लाभांश घोषणा गरेको हो ।
बैंकको मंसिर १२ गते सोमबार साँझ बसेको सञ्चालक समिति बैठकले सेयरधनीहरुलाई ३ प्रतिशत बोनस सेयर र ७.५३ प्रतिशत नगद गरी कुल १०.५३ प्रतिशत लाभांश वितरण गर्ने निर्णय गरेको हो ।
प्रस्तावित लाभांश नियामक नेपाल राष्ट्र बैंक र एसबीआईको आगामी वार्षिक साधारण सभाले अनुमोदन गरेपछि वितरण हुनेछ ।
सेञ्चुरी कमर्सियल बैंक
सेञ्चुरी कमर्सियल बैंकले गत वर्षको मुनाफाबाट लाभांश घोषणा गरेको हो ।
बैंकले कुल ५ प्रतिशत लाभांश वितरण गर्न लागेको छ । जसमा ४.७५ प्रतिशत बोनस सेयर र कर प्रयोजनको लागि ०.२५ प्रतिशत नगद लाभांश रहेको छ ।
यो लाभांश नियामक केन्द्रीय बैंकको स्वीकृति र साधारण सभाबाट अनुमोदन भएपछि सेयरधनीले पाउनेछन् ।
आई.सि.एफ.सि.फाइनान्स
आई.सि.एफ.सि.फाइनान्स लिमिटेडले मंसिर १४ गते सम्पन्न कम्पनीको सञ्चालक समितिको बैठकले लाभांश वितरण गर्ने निर्णय गरेको हो।
कम्पनीले गत आर्थिक वर्षको मुनाफाबाट शेयरधनीहरुलाई हाल कायम चुक्ता पूँजीको १० प्रतिशत लाभांश वितरण गर्ने घोषणा गरेको हो । सोमध्ये ५ प्रतिशत बोनस शेयर रहेको छ भने ५ प्रतिशत कर प्रयोजनार्थ सहित नगद लाभांश रहेको छ ।
उक्त प्रस्तावित लाभांश नेपाल राष्ट्र बैंकबाट स्वीकृत भई आगामी वार्षिक साधारण सभाले पारित गरेपश्चात सम्बन्धित शेयरधनीले प्राप्त गर्न सक्ने छन ।
वि.सं.२०७९ मंसिर १५ बिहीवार १७:३८ मा प्रकाशित