काठमाडौं । अटोमोबाइल एसोसिएसन नेपाल (नाडा) ले सरकार विरुद्ध पहिलो चरणको सडक आन्दोलन घोषणा गरेको छ । विगत ९ महिनादेखि सरकारले सवारीसाधनमा लगाएको आयात प्रतिबन्धको बिरोध गर्दै नाडाले विभिन्न माग राख्दै घोषणा गरेको हो ।
नाडाका अध्यक्ष ध्रुव थापाले आयात प्रतिबन्धको कारण ५८ ओटा डिलर बन्द भइसकेको छ भने अन्य १०० भन्दा बढी बन्द हुने अवस्थामा रहेको जानकारी दिए ।
प्रत्यक्ष राजस्वमा २१ प्रतिशत योगदान, लाखौंलाई रोजगारी दिएको क्षेत्रलाई उपेक्षा गरिएको भन्दै नाडाका अध्यक्ष थापाले गाडीहरू फाइनान्स नै नहुने अवस्था रहेको जानकारी गराए ।
सवारी आयातमा ५० प्रतिशत र पार्टसमा १०० प्रतिशत मार्जिन राख्नु परेको उनको भनाइ छ । ३० प्रतिशत अटोमोबाइल कर्मचारी कटौती गरिसकेको उनले जानकारी गराए ।
सरकारकै कारण व्यवसायी आन्दोलनमा जानु परेको नाडाले जनाएको छ । नाडाले आगामी २२ गतेसम्मका लागि पहिलो चरणको आन्दोलन घोषणा गरेको छ । त्यस्तै दोस्रो चरणमा भने सर्भिस समेत बन्द गर्ने नाडाले जनाएको छ ।
वि.सं.२०७९ मंसिर १६ शुक्रवार १४:५३ मा प्रकाशित
