काठमाडौं । ईण्डियन आयल कर्पोरेशन लिमिटेडबाट नयाँ खरिद मूल्यसूची बमोजिम पेट्रोलियम पदार्थको मूल्यमा घटबढ भएता पनि हाललाई पेट्रोलियम पदार्थको खुद्रा बिक्री मूल्य यथावत् राखिएको नेपाल आयल निगमले जनाएको छ ।
आज मंगलबार एक प्रेस विज्ञप्ति जारी गर्दै निगमले पेट्रोलमा केही बढेर र डिजेल तथा हवाई इन्धनमा केही घटेर आएको भएतापनि निगमलाई हाल एल.पी. ग्यासमा प्रति सिलिण्डर रु ३५९.५० घाटा रहेको जनाएको छ ।
निगमले नेपाल सरकारसँग ५ प्रतिशत वार्षिक ब्याजदरमा रु ७ अर्ब ऋण लिएकोमा उक्त ऋणको तिर्नुपर्ने प्रथम किस्ता वापत रू. ७० करोड र पौष मसान्तसम्मको व्याज रकम रू. १८ करोड गरी जम्मा रू. ८८ करोड निगमले गरेको बचतबाट २०७९ पौष मसान्तमा नेपाल सरकारलाई भुक्तानी गरेको विज्ञप्तिमा उल्लेख छ ।
निगमले ईण्डियन आयल कर्पोरेशन लिमिटेडलाई हालसम्म भुक्तानी गर्नुपर्ने रकम, पुरानो बक्यौता एवं नेपाल सरकारलाई तिर्नुपर्ने ऋण समेत गरी अझै पनि करिव रु १७ अर्ब ३० करोड तिर्न बाँकी रहेको निगमले जनाएको छ ।
हेर्नुहोस विज्ञप्ति
वि.सं.२०७९ माघ ३ मंगलवार २२:०९ मा प्रकाशित