काठमाडौं । सगरमाथा इन्स्योरेन्स र लुम्बिनी जनरल इन्स्योरेन्स मर्जरमा जाने भएको छ । यी दुवै कम्पनी एक आपसमा गाभिनका लागि मंगलबार अन्तिम मर्जर सम्झौता पत्रमा हस्ताक्षर गरेका छन् । होटल र्याडिसनमा आयोजित एक कार्यक्रम यी दुवै कम्पनीले मर्जर सम्झौता पत्रमा हस्ताक्षर गरेका हुन् ।
सम्झौतापत्रमा सगरमाथा इन्स्योरेन्सका तर्फबाट अध्यक्ष रामकृष्ण मानन्धर र लुम्बिनी जनरल इन्स्योरेन्सका तर्फबाट अध्यक्ष मनोहर दास मुलले हस्ताक्षर गरेका छन ।
मर्जपछि बन्ने नयाँ कम्पनीको नाम भने सगरमाथा लुम्बिनी इन्स्योरेन्स रहने सहमति भएको छ । मर्जर सम्वन्धी विशेष प्रस्ताव दुवै कम्पनीको आगामी साधारण सभामा लगिने बताइएको छ । दुवै कम्पनीको सेयर आदान प्रदान अनुपात स्वाप रेसियो भने १००ः८० कायम हुनेछ ।
दुबै कम्पनीको आ.व ०७८/०७९ को वित्तिय अनुसार प्रस्तावित बोनस सेयर वितरण पश्चात स्वाप रेसियो गणना गरी मर्जर पश्चात कायम हुने कम्पनीको चुक्ता पुँजी २ अर्ब ६२ करोड २६ लाख ३८ हजार १९५ रुपैंया कायम रहनेछ ।
संचालक समितिको संचालकमा दुवै कम्पनीको तर्फबाट ३/३ जना र एक जना स्वतन्त्र संचालकको रुपमा रहनेछ ।
नयाँ कम्पनीको संचालक समितिको अध्यक्षमा लुम्बिनी इन्स्योरेन्सको तर्फबाट बन्ने सहमति भएको छ । कम्पनीको प्रमुख कार्यकारी अधिकृत सगरमाथा इन्स्योरेन्सको तर्फबाट चंकी क्षेत्री बन्नेछन् ।
वि.सं.२०७९ माघ १८ बुधवार १९:१९ मा प्रकाशित