काठमाडौं । समयमा नै विवरण उपलब्ध नगराएको भन्दै नेपाल बीमा प्राधिकरणले १० वटा बीमा कम्पनीलाई चेतावनी दिएको छ ।
प्राधिकरणले ३ वटा जीवन बीमा कम्पनी, ६ वटा निर्जीवन बीमा कम्पनी र एक वटा पुनर्बीमा कम्पनी गरी १० वटा कम्पनीलाई चेतावनी दिएको हो ।
सम्पत्ति शुद्धीकरण तथा आतंकवादी क्रियाकलापमा वित्तीय लगानी निवारण सम्बन्धी निर्देशिका अनुसार बीमा कम्पनीहरुले आफुले गरेको कारोबारको सम्पूर्ण विवरणसहितको वित्तीय विवरण पेश गर्नुपर्ने व्यवस्था छ ।
समयमै वित्तीय विवरण पेश गर्न नसकेका बीमा कम्पनीहरुलाई १० लाख रुपैयाँसम्म जरिवाना गर्न सकिने व्यवस्था छ ।
तोकिएको समय भित्र वित्तीय विवरण नबुझाउनेमा जीवन बीमा तर्फ गुराँस लाइफ, रिलायबल नेपाल लाइफ र सानिमा लाइफ इन्स्योरेन्स रहेका छन् ।
त्यस्तै, ६ निर्जीवन बीमा तर्फ कम्पनीमा राष्ट्रिय बीमा कम्पनी, युनाइटेड इन्स्योरेन्स, सगरमाथा इन्स्योरेन्स, प्रुडेन्सियल इन्स्योरेन्स, लुम्बिनी जनरल इन्स्योरेन्स र सिद्धार्थ इन्स्योरेन्स रहेका छन् । यस्तै हिमालयन रिइन्स्योरेन्सलाई पनि प्राधिकरणले वित्तीय विवरण नबुझाएको भन्दै चेतावनी दिएको छ ।
सम्पत्ति शुद्धीकरण तथा आतंकवादी क्रियाकलापमा वित्तीय लगानी निवारण सम्बन्धी निर्देशिका अनुसार समयमै वित्तीय विवरण नबुझाएका बीमा कम्पनीहरुलाई सचेत गराएको प्राधिकरणले जानकारी गराएको छ ।
वि.सं.२०७९ माघ १९ बिहीवार १४:४१ मा प्रकाशित