काठमाडौं । मर्जर प्रक्रियामा रहेका सानिमा लाइफ र रिलायन्स लाइफ इन्स्योरेन्सले एकै दिन वार्षिक साधारण सभा बोलाएका छन् । दुवै कम्पनीले फागुन १२ गते सभा बोलाएका हुन् । यी कम्पनीहरुको आर्थिक वर्ष ०७७/७८ को वार्षिक साधारण सभा गर्न लागेका हुन् ।
दुवै इन्स्योरेन्सले सभामार्फत एक–आपसमा गाभ्ने गाभिने (मर्जर) सम्बन्धी विशेष प्रस्ताव पारित गर्ने भएका छन् । सम्पत्ति तथा दायित्वको मुल्यांकन प्रतिवेदन समेतको आधारमा निर्धारण गरिएको १ः१ सेयर स्वाप रेसियो हुने गरी मर्जरलाई अन्तिम स्वीकृति प्रदान गर्ने प्रस्ताव सभामा पेश हुनेछ ।
यस्तै, एक आपसमा गाभ्ने गाभिने सम्बन्धी प्रारम्भिक सम्झौतापत्र, अन्तिम सम्झौतापत्र तथा अन्य सम्झौताहरु अनुमोदन गर्ने विशेष प्रस्ताव रहेको छ ।
मर्जर पनि बन्ने कम्पनीको नाम ‘सानिमा रिलायन्स लाइफ इन्स्योरेन्स लिमिटेड’ रहने गरी प्रबन्धपत्र तथा नियमावली संशोधन गर्ने प्रस्ताव पनि रहेको छ । यी दुवै कम्पनीले आर्थिक वर्ष २०७७/७८ को नाफाबाट लाभांश वितरण नगर्ने भएका छन् ।
दुवै कम्पनीले हाल ७०ः३० अनुपातमा रहेको संस्थापक र सर्वसाधारण समूहको सेयर संरचनालाई परिवर्तन गरी ५१ः४९ अनुपात कायम गर्ने प्रस्ताव पनि साधारण सभामा पेश गर्नेछन् ।
साधारण सभा प्रयोजनका लागि दुवै कम्पनीले माघ २९ गते बुक क्लोज गर्ने भएकाले माघ २८ गतेसम्म कायम रहने सेयरधनीले मात्र सभामा भाग लिन पाउने छन् ।
वि.सं.२०७९ माघ २० शुक्रवार ११:१८ मा प्रकाशित