काठमाडौं । नीति तथा कार्यक्रममार्फत ल्याइएको नयाँ कर नीतिको पूँजी बजारका लगानीकर्ताले विरोध गरेका छन् । धितोपत्र बजारका लगानीकर्ताले आज बिहान अर्थमन्त्रीको घर घेराउ गर्ने भएका छन् भने दिउँसो ब्रोकर कार्यालयमा सिस्टम बन्द गर्न जाने भएका छन्।
विगत दुई दिनदेखि सडक आन्दोलनमा उत्रिएका लगानीकर्ताहरुले गत शुक्रबार माइतीघर मण्डलामा भेला भई यस्तो कार्यक्रम तय गरेका हुन्। सरकारले आगामी आर्थिक वर्षको बजेटबाट धितोपत्र कारोबारमा थप कर लगाएको भन्दै लगानीकर्ताहरु आन्दोलित भएका हुन्।
सरकारले शेयर कारोबारमा व्यवसाय सरह नै कर लगाउन खोजेको आरोप लगानीकर्ताले लगाएका छन्। विद्यमान पूँजीगत लाभकर दीर्घकालिन ५ र अल्पकालिन ७.५ प्रतिशत नै अन्तिम कर कायम गर्नुपर्ने अडान लगानीकर्ताहरुले राखेका छन्।
गत शुक्रबारको प्रदर्शनमा उनीहरुले करको दर परिमार्जन नगरी विधमानकै व्यवस्था लागु हुनुपर्नेमा जोड दिएका थिए।
वि.सं.२०८० जेठ २१ आइतवार ०६:५७ मा प्रकाशित
