काठमाडौं । बजेटमार्फत कर नीतिको विरोध जनाउँदै शेयर लगानीकर्ताहरुले आज काठमाडौमा रहेका ५० वटै ब्रोकर कार्यालयहरुमा तालाबन्दी गरिसकेका छन् । लगानीकर्ता वार्ताका लागि अर्थमन्त्रालय टोलिसँग छलफलमा बस्दैछन् । नेपाल स्टक एक्सचेन्ज (नेप्से)ले भने कारोबार प्रणाली खुला नै राखेको छ। यद्यपि सेयर कारोबार नगण्य मात्रामा भएको छ।
गत बिहीबारदेखि पुँजीबजारमा लिइने ५ प्रतिशत र ७.५ प्रतिशत पुँजीगत लाभकर नै अन्तिम हुनुपर्ने भन्दै आन्दोलनमा उत्रिएका छन्। सरकारले आफूहरुलाई आयकरको दायरामा ल्याउन खोजेको उनीहरुको भनाइ छ।
आन्दोलनरत लगानीकर्ताले आर्थिक विधेयक २०८०मा ल्याइएको करसम्बन्धी बुँदा नं. २९ खारेज हुनुपर्ने एकसूत्रीय माग राखेका छन्। उनीहरुले आज बिहानैदेखि कारोबार रोक्ने भन्दै ५० वटै ब्रोकर हाउसमा ताला पनि लगाए। तर, नेप्सेले भने कारोबार प्रणाली बन्द गरेको छैन।
नेप्सेले कारोबार प्रणाली बन्द नगरे पनि यो समाचार तयार पार्दासम्म एउटा कम्पनीको १११ कित्ता सेयर ६० हजार ७२५ रुपैयाँमा कारोबार भएको छ।
कारोबार नगण्य भए पनि नेप्से सूचक ११ बजेर २१ मिनेट जाँदासम्म १.७८ अंकको बढोत्तरी साथ १८६८ को विन्दुमा रहेको छ।
वि.सं.२०८० जेठ २१ आइतवार ११:२८ मा प्रकाशित
