काठमाडौं, २१ जेठ । सरकारले पुँजीबजारमा लाग्ने पुँजीगत लाभकर यथावत राखेपछि आन्दोलनमा उत्रिएका लगानीकर्ताहरुले आन्दोलन फिर्ता गरेका छन् ।
लगानीकर्ताले बजेटको २९ नं. बुदा हटाउन माग गरेका थिए । शेयर लगानीकर्ताको तर्फबाट लगानीकर्ता तिलक कोइरालाको संयोजकमा अर्थमन्त्रालयका अधिकारीसँग भएको वार्तामा सहमति भएको हो । लगानीकर्ता तिलक कोइरालाका अनुसार अर्थमन्त्री प्रकाशशरण महतले २९ नम्बरको बुँदा संसदीय समितिमा लगेर संसदीय प्रक्रियाबाट निष्क्रिय पार्ने आश्वासन दिएका छन् ।
अब ५ प्रतिशत र ७.५ प्रतिशत पूँजीगत लाभकरलाई नै अन्तिम कर मानिनेछ । वातार्मा अर्थमन्त्रीसहित राजस्व सचिव, आन्तरिक राजस्व विभागका महानिर्देशकलगायतको सहभागि थिए । लगानीकर्ताले सबै आन्दोलनका कार्यक्रम फिर्ता फिर्ता लिएको बताएका छन् ।
अर्थमन्त्रालयमा भएको वार्ता सफल भएपछि शेयर कारोबार खुलेको छ। बजार खुलेसँगै नेप्से परिसूचक तीव्र गतिमा बढ्न थालेको छ। यस समाचार तयार पार्दासम्ममा नेप्से परिसूचक करिब ३२ अंकले बढेको छ।
वि.सं.२०८० जेठ २१ आइतवार १२:२९ मा प्रकाशित
