काठमाडौं । पाँच म्युुचुअल फन्डको लाभांश सुरक्षित गर्ने आज असोज १० गते अन्तिम दिन हो । जसमा नगद लाभांश वितरण प्रयोजनका लागि ‘एनएमबि ५०’, ‘एनएमबि हाइब्रिड फन्ड एल–१’ र प्रभु सेलेक्ट फन्डले असोज १२ गते शुक्रबार बुक क्लोज गर्दैछन् ।
असोज ११ गते बिहीबार इन्द्र जात्रा परेको छ । यस पर्वमा काठमाडौं उपत्यकामा सार्वजनिक विदा हुन्छ । उपत्यका विदामा नेप्से तथा सेयर बजार बन्द हुन्छ । यसआधारमा आजसम्म कायम इकाईधनीले मात्र यी तीन म्युचुअल फन्डले वितरण गर्ने लाभांश सुरक्षित गर्न सक्नेछन् । ‘एनएमबि ५० र ‘एनएमबि हाइब्रिड फन्डले आर्थिक वर्ष २०७९/८० को नाफाबाट करसहित १५ प्रतिशतका दरले नगद लाभांश वितरण गर्दैछन् ।
प्रभु सेलेक्ट फन्डले आर्थिक वर्ष २०७९/८० को नाफाबाट कर सहित ९.५० प्रतिशत नगद लाभांश वितरण गर्दैछ । यस्तै, सानिमा इक्विटी र सनराइज फस्र्ट म्युचुअल फन्डको पनि लाभांश सुरक्षित गर्ने पनि आज असोज १० गते अन्तिम दिन हो ।
नगद लाभांश वितरण प्रयोजनका लागि यी फन्डले असोज १४ गते आइतबार बुक क्लोज गर्दैछन् । तर, असोज १३ गते शनिबार, १२ गते शुक्रबार र बिहीबार असोज ११ गते इन्द्र जात्रा परेको छ । सो दिन नेप्से तथा सेयर बजार बन्द हुन्छ।
तसर्थ, आजसम्म कायम इकाईधनीले मात्र यी दुई म्युचुअल फन्डले वितरण गर्ने लाभांश सुरक्षित गर्न सक्नेछन् । सानिमा इक्विटी फन्डले आर्थिक वर्ष २०७९/८० को नाफाबाट १८ प्रतिशत र सनराइज फन्डले कर सहित १६ प्रतिशत नगद लाभांश वितरण गर्दैछन् ।
वि.सं.२०८० असोज १० बुधवार १२:२१ मा प्रकाशित
