काठमाडौं । हिमालयन बैंक लिमिटेडले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण प्रकाशित गरेको छ। प्रकाशित विवरण अनुसार चालु आर्थिक वर्षको पुस मसान्तसम्ममा बैंकले १ अर्ब ५१ करोड ८७ लाख रुपैयाँ खुद नाफा कमाएको छ। यो गत आर्थिक वर्षको सोही अवधिको तुलनामा ०.९८ प्रतिशत बढी हो। गत आर्थिक वर्षको सोही अवधिसम्ममा बैंकले १ अर्ब ५० करोड ३९ लाख रुपैयाँ खुद नाफा कमाएको थियो।
समीक्षा अवधिमा बैंकको खुद ब्याज आम्दानी १०.०४ प्रतिशत, खुद फि तथा कमिशन आम्दानी १३.१२ प्रतिशत, कुल सञ्चालन आम्दानी ८.०३ प्रतिशत घटेको छ। समीक्षा अवधिमा बैंकको इम्पेरमेन्ट चार्ज १ अर्ब ९४ करोडबाट घटेर १८ करोड ४६ लाख रुपैयाँमा सीमित भएको छ। बैंकको सञ्चालन मुनाफा ४१.२२ प्रतिशत बढेको छ।
बैंकको चुक्तापुँजी २१ अर्ब ६५ करोड ६६ लाख रुपैयाँ छ । बैंकको जगेडा कोषमा १६ अर्ब ४८ करोड रुपैयाँ सञ्चित छ।
नाफासँगै बैंकको प्रतिशेयर आम्दानी पनि १४ पैसा बढेर १४ रुपैयाँ ३ पैसा पुगेको छ। पुस मसान्तसम्ममा बैंकको प्रतिशेयर नेटवर्थ १७६ रुपैयाँ ११ पैसा रहेको छ । यसअवधिमा बैंकको मूल्य आम्दानी अनुपात १६.६८ गुणा रहेको छ। यस अवधिसम्ममा बैंकको वितरणयोग्य मुनाफा भने ३ अर्ब ९५ करोड ९ लाख रुपैयाँ ऋणात्मक रहेको छ।
वि.सं.२०८१ माघ ७ सोमवार ०६:५० मा प्रकाशित
