काठमाडौं : नेपालको वित्तीय क्षेत्रलाई साइबर खतराबाट जोगाउन नेपाल राष्ट्र बैंकका लागि एक नयाँ साइबर सुरक्षा रोडम्याप औपचारिक रूपमा हस्तान्तरण गरिएको छ। राष्ट्र बैंकका गर्भनर विश्वनाथ पौडेललाई फेडरेसन अफ कम्प्युटर एसोसिएसन नेपाल (CAN महासंघ) का वरिष्ठ उपाध्यक्ष चिरञ्जीबी अधिकारीले आज यो रणनीतिक खाका हस्तान्तरण गरेका हुन्।
बैंक तथा वित्तीय संस्थाहरू (BFIs) मा साइबर सुरक्षालाई मजबुत बनाउन लक्षित यो योजना नेपाल राष्ट्र बैंक, सरकार, प्राविधिक संघसंस्था र अनुसन्धान केन्द्रहरूको सहकार्यमा तयार गरिएको हो।
कार्यक्रममा सूचना तथा सञ्चार प्रविधि मन्त्रालय, CSRI नेपाल, npCERT र CAN महासंघका प्रतिनिधिहरूले नेपालमा साइबर सुरक्षा मजबुत बनाउन दीर्घकालीन सहकार्य आवश्यक रहेको बताएका थिए।
रोडम्याप अनुसार, सबै बैंकहरूमा प्रमुख सूचना सुरक्षा अधिकारी (CISO) अनिवार्य रूपमा नियुक्ति गरिनेछ र साइबर सुरक्षाका लागि उच्चस्तरीय समिति गठन गरिनेछ। वित्तीय क्षेत्रका साइबर घटनाहरू व्यवस्थापन गर्न FinCERT-नेपाल नामको नयाँ टोली गठन गरिनेछ, जसले नेपाल प्रहरी र npCERT सँग मिलेर काम गर्नेछ।
साथै, सबै बैंकहरू npCERT सँग अनिवार्य रूपमा जोडिने व्यवस्था गरिएको छ। साइबर जोखिम मूल्यांकन, कडा डिजिटल भुक्तानी सुरक्षा, २४ घण्टा सक्रिय निगरानी प्रणाली, र साइबर घटनाको तत्काल प्रतिवेदन अनिवार्य गरिनेछ।
तेस्रो पक्ष सेवा प्रदायकहरू र क्लाउड सेवामा कडा सुरक्षा मापदण्ड लागू गरिनेछ। साइबर सुरक्षामा जनचेतना फैलाउन र दक्ष जनशक्ति उत्पादन गर्न बैंकहरूले साइबर सुरक्षा छात्रवृत्ति र तालिम कार्यक्रम सञ्चालन गर्नेछन्।
नियमित अडिट, अनुपालन अनुगमन र जरिवानासमेत व्यवस्था गरिएको यो रोडम्यापले नेपालमा सुरक्षित र भरपर्दो डिजिटल वित्तीय प्रणाली बनाउन सघाउने विश्वास राखिएको छ।
वि.सं.२०८२ असार ६ शुक्रवार १६:५३ मा प्रकाशित
