काठमाण्डौं । निर्वाचन आयोगले आगामी मङ्सिर १४ गतेका लागि तोकेको उपनिर्वाचनमा लाग्ने खर्च रकम तय भएको छ । निर्वाचन आयोगले पचास पदका लागि ४० करोड खर्च गर्ने भएको छ। करिब ६ हजार ८ सय जनशक्ति परिचालन गर्नुपर्ने अनुमान गरिएको उक्त निर्वाचनका लागि आयोगले ४० करोड रकम प्रस्ताव गरी निकासाका लागि अर्थमन्त्रालयमा पत्रचार गरिसकेको छ।
प्रतिनिधिसभाको एक, प्रदेशसभाका तीन र गाउँपालिकाका अध्यक्ष तथा उपाध्यक्ष चार, नगरपालिका प्रमुख एक र वडाध्यक्ष ४१ समेत गरी ५० पदका लागि निर्वाचन हुने आयोगका प्रवक्ता शङ्करप्रसाद खरेलले बताउनुभयो ।
उक्त निर्वाचनमा करिब पाँच लाख मतदातालाई मतदान गर्ने अधिकार प्राप्त हुनेछ। निर्वाचन ५५० मतदान केन्द्रमा सञ्चालन हुने बताइएको छ ।
गत साउन १६ गते १८ वर्ष उमेर पुगेका र निर्वाचन केन्द्रमा मतदाता नामावलीमा नाम समावेश भएका नेपाली नागरिकले मतदानमा भाग लिन पाउनेछन्। निर्वाचनको तयारीका लागि आयोग तीव्रताका साथ जुटिरहेको प्रवक्ता खरेलले जानकारी दिनुभयो ।
२०७६ भदौ ३ गते प्रकाशित
वि.सं.२०७६ भदौ ३ मंगलवार ११:३५ मा प्रकाशित