Logo

जलविद्युतमा निजी क्षेत्रको आक्रामक लगानी

काठमाडौं । निजी क्षेत्रले गत आर्थिक वर्षसम्म ८३ वटा जलविद्युत् आयोजनाबाट ५६० मेगावाट बिजुली उत्पादन गरेको छ। नेपालको जलविद्युत् क्षेत्रमा निजी क्षेत्रले पछिल्लो समय सशक्त ढंगले आफ्नो उपस्थिति देखाउँदै आएको छ ।

परिणामस्वरुप निजी क्षेत्रले कुल उत्पादनको २९ प्रतिशत हिस्सा ओगट्दै आएको छ । नेपाल विद्युत प्राधिकरणका अनुसार गत आर्थिक वर्षमा सात अर्ब ५५ करोड युनिट (गिगावाट आवर) मध्ये प्राधिकरण मातहतका आयोजनाबाट दुई अर्ब ५५ करोड युनिट (३४ प्रतिशत) बिजुली उत्पादन भएको छ ।

निजी उत्पादकबाट दुई अर्ब १९ करोड युनिट (२९ प्रतिशत) उत्पादन भएको थियो। भारतबाट करिब तीन अर्ब ४७ करोड युनिट (३७ प्रतिशत) बिजुली आयात गरेको प्राधिकरणको वार्षिक प्रतिवेदनमा उल्लेख छ ।

प्राधिकरणका कार्यकारी निर्देशक कुलमान घिसिङ पछिल्लो समय निजी क्षेत्रले जलविद्युत् क्षेत्रमा आक्रामक ढंगले लगानी गर्दै आइरहेको बताउनुभएको छ । ‘जलविद्युत् आयोजनामा निजी क्षेत्रको उपस्थिति बढ्दै गइरहेको छ,’ उहाँले भन्नुभयो, ‘अहिले निजी क्षेत्रले कुल उत्पादनमा २९ प्रतिशतभन्दा धेरै योगदान गरेको छ ।’

गत आर्थिक वर्षमा निजी क्षेत्रबाट सञ्चालित आठवटा जलविद्युत् आयोजना निर्माण सम्पन्न भएको थियो। जसबाट ४८ मेगावाट बिजुली उत्पादन भएको थियो । ‘ऊर्जा विकासमा निजी क्षेत्रको महत्वपूर्ण योगदान रहँदै आएको छ,’ उहाँले भन्नुभयो, ‘निजी क्षेत्रको भूमिकालाई हामीले भुल्नै सक्दैनौ।’ नागरिक दैनिकमा समाचार छ ।

२०७६ भदौ १५ गते प्रकाशित

प्रतिक्रिया दिनुहोस्


कार्यालय : लाजिम्पाट २, काठमाडौँ
नेपाल

© 2018 All Right Reserved Arthatantra News
DEVELOPED BY appharu.com