हेटौँडा । प्रदेश नं ३ मा मुख्यमन्त्री डोरमणि पौडेलले मौजुदा मन्त्रिपरिषदमा आज चार जना नयाँ मन्त्री थपी मन्त्रिपरिषद्विलाई पूर्णता दिएका छन् ।
नवनियुक्त मन्त्रीहरुमा नेकपा एमालेका तर्फबाट कैलाश ढुंगेल आर्थिक मामिला तथा योजना, अरुण नेपाल उद्योग पर्यटक, वन र वातावरण, दावा दोर्जे लामा भूमि व्यवस्थापन कृषि र सहकारी र नेकपा माओवादी केन्द्रका युवराज दुलाल सामाजिक विकास मन्त्री हुनुहुन्छ ।
प्रदेश नं ३ का प्रमुख अनुराधा कोइरालाले यहाँ आयोजित समारोहमा नवनियुक्त चारजना मन्त्रीलाई पद तथा गोपनीयताको शपथ ग्रहण गराउनुभएको थियो ।
उक्त कार्यक्रममा प्रदेशसभाका सभामुख सानुकुमार श्रेष्ठ, उपसभामुख राधिका तामाङ र विभिन्न मन्त्रालयका सचिव सहभागी हुनुहुन्थ्यो ।वर्तमान मन्त्रिपरिषद्मा मुख्यमन्त्रीसहित सात जना मन्त्री रहने मुख्य मन्त्री तथा मन्त्रिपरिषद्को कार्यालयले जनाएको छ ।
नवनियुक्त मन्त्रीले आगामी शुक्रबार पदबहाली गर्ने कार्यक्रम रहेको मुख्यमन्त्री तथा मन्त्रिपरिषद् कार्यालयका प्रमुख सचिव रेश्मीराज पाण्डेले जानकारी दिए ।
२०७४ फागुन १६ गते प्रकाशित
वि.सं.२०७४ फागुन १६ बुधवार १९:३७ मा प्रकाशित