काठमाडौँ, । प्यासिफिक एशिया ट्राभल एशोसियशन ‘(पाटा) युथ ट्यालेन्ट क्वेस्ट’ दोस्रो संकरणको उपाधि आइएसटी कलेजकी छात्रा तमन्ना प्रधान र मिडभ्याली इन्टरनेशनलका छात्र जिङ्गमे लामाले जितेका छन् ।
नेपाल पर्यटन तथा होटल व्यवस्थापन प्रतिष्ठान (नाथम) मा आज सम्पन्न प्रतियोगितामा क्रमशः ‘पब्लिक स्पिकिङ्ग’ प्रधान र ‘कन्टेन्ट राइ्टिङ्ग’ विषयमा लामाले उपाधि चुमेका हुन् ।
विजेताले पुरुस्कारस्वरुप आगामी सेप्टेम्बर १२ देखि १४ सम्म लङ्ककावी मलेसियामा आयोजना हुने पाटा ट्राभल मार्ट–२०१८ मा सहभागी हुने अवसर प्राप्त गरेको आयोजक पाटा नेपाल च्याप्टरले जनाएको छ ।
प्रतियोगिताका दुईवटै विधामा पाटा नेपाल सदस्य शैक्षिक संस्थाहरु गेट, नाथम, क्याथ, एनसीटीटीएम, मिडभ्याली, पब्लिक युथ, सिल्भर माउन्टेन र आईएसटी कलेजका गरी १६ जना विद्यार्थी सहभागी थिए ।
यस वर्ष पाटाले नेपाली पर्यटन क्षेत्रको समसामयीक चुनौतीपूर्ण विषयहरु ‘वर्तमान परिप्रेक्षमा नेपाली पर्यटन प्रवद्र्धनका लागि विश्लेषण’ तथा ‘प्रतिभा पलायन न्यूनीकरण तथा दिगो दक्ष जनशक्ति निर्माणका उपायहरु’ शीर्षकमा प्रतियोगिता गरेको हो ।
नेपाली पर्यटन क्षेत्रमा अध्ययनरत् विद्यार्थीहरुको ज्ञान, सीप र क्षमतालाई प्रतिस्पर्धामार्फत प्रस्फुटित गराउने तथा नेपाली पर्यटन क्षेत्रमा भावी सबल पर्यटन जनशक्तिको खोजी गर्ने उद्देश्यका साथ पाटा नेपालले गत वर्षदेखि प्रतियोगिता शुरु गरेको थियो ।
पाटा नेपाल च्याप्टर सदस्य शैक्षिक संस्थाहरुमा अध्ययनरत् विद्यार्थीबीच यो प्रतिस्पर्धा गराइन्छ । पाटा नेपालले प्रतिभावान विद्यार्थीलाई आवश्यक तालीम तथा विविध अवसर प्रदान गराई उनीहरुको सशक्तीकरण तथा सुनौलो भविष्य निर्माणका लागि प्रेरक माध्यमको रुपमा यस कार्यक्रमलाई अघि सारेको विज्ञप्तिमार्फत जनाएको छ ।
पर्यटन क्षेत्रमा दक्ष जनशक्ति निर्माण तथा नयाँ पुस्तामा नेतृत्व सीप अभिवृद्धि गर्ने उद्देश्यले अभियानलाई निरन्तरता दिइएको पाटा नेपालका अध्यक्ष सुनिल शाक्यले बताउनुभयो ।
पूर्व पर्यटन सचिव दीपेन्द्रपुरुष ढकालले पाटा नेपालको दक्ष जनशक्ति निर्माण अभियानमा “युथ ट्यालेन्ट क्वेस्ट” जस्ता महत्वपूर्ण कार्यहरु सराहनीय छ भन्नुभयो ।
नेपालले दिगो पर्यटन विकास, दक्ष जनशक्ति निर्माण एवम् सशक्तीकरण अभियानलाई सार्थक बनाउन लागिपरेको पाटा नेपालका प्रमुख कार्यकारी अधिकृत सुरेशसिंह बुडालले जानकारी दिनुभयो ।
२०७५ साउन २२ गते प्रकाशित ।
वि.सं.२०७५ साउन २२ मंगलवार ११:३० मा प्रकाशित
