काठमाडौं । नेपाल राष्ट्रबैंकले वाणिज्य बैंकका अध्यक्ष र सीइओहरु बिच छलफल कार्यक्रम राखि असार २७ गते मौद्रिक नीति ल्याउने जानकारी दिएको छ । राष्ट्रबैंकले यसपटकको मौद्रिक नीतिमार्फत बिग मर्जरको नीतिलाई विशेष प्राथमिकता दिने बताइएको छ ।
छलफलमा समेत केन्द्रीय बैंकका अधिकारीहरुले यो विषयमा प्रष्ट संकेत गरेका बैंकरहरुको बुझाई छ । बैंकहरुलाई २० गतेभित्र आफ्ना लागि उपयुक्त पार्टनरको नामसहित मर्जरका लागि लिखित प्रतिबद्धता पठाउन निर्देशन दिइएको छ । मर्जरको लागि पार्टनर आफैं खोज्न नसक्ने बैंकको हकमा भने राष्ट्र बैंक कडा रुपमा प्रस्तुत हुने देखिएको बताइएको छ ।
राष्ट्रबैंकले बैंकहरुको नाम नै तोकेर फोर्स मर्जरमा लैजाने स्रोतले जनाएको छ । यस्तै, यसपटकको मौद्रिक नीतिमार्फत बैंकिङ प्रणालीको वित्तीय स्थायीत्व, तरलता समस्याको समाधान लगायतका विषयमा समेत महत्वपूर्ण नीतिगत व्यवस्था हुनसक्ने अनुमान छ । सरकारले बजेटमार्फत घोषणा गरेको सुनचाँदीजस्ता बहुमूल्य धातुलाई निक्षेपको रुपमा बैंकमा जम्मा गर्न सकिने विषयमा समेत नीतिगत व्यवस्था हुनेछ । यस्तो निक्षेप नेपालका लागि नौलो कार्यक्रम हुनेछ ।
राष्ट्रबैंक स्रोतका अनुसार सरकारले लिएको साढे ८ प्रतिशतको वृद्धिदरको लक्ष्य पूरा गर्नेतर्फ मौद्रिक नीति तयार भइरहेको र उक्त नीतिले ६ प्रतिशतको सीमा भित्र मुद्रास्फितिलाई ल्याउने गरि नीतिगत व्यवस्था गर्ने बताइएको छ ।
२०७६ असार २२ गते प्रकाशित
वि.सं.२०७६ असार २२ आइतवार १६:०१ मा प्रकाशित
