काठमाडौं । मासुको मूल्य अस्वाभाविक रूपमा बढेपछि वाणिज्य, आपूर्ति तथा उपभोक्ता संरक्षण विभागले कलंकीस्थित खसी बजारका ६ होलसेल व्यापारीलाई जरिवाना गरेको छ ।
व्यापारीले बिल जारी नगरी जिउँदो खसीको प्रतिकिलो ५ सय ६० देखि ६ सय ८० रुपैयाँसम्ममा बिक्री गरिरहेको पाएपछि कारबाही गरेको हो । विभागले कलंकी खसीबजारका ९ वटा होलसेल पसलमा अनुगमन भएको र यस क्रममा ६ वटा पसललाई जनही ५ हजारका दरले जरिवाना गरेको हो ।
विभागका अनुगमन निरीक्षक दीपक पोखरेलका अनुसार ती व्यवसायीले दर्ताविना नै स्टल सञ्चालन गरिरहेका थिए । पसल दर्ता नगरी खरिद बिक्रीको कुनै काजगात देखाउन नसकेपछि उपभोक्ता संरक्षण ऐन २०७५ अनुसार आर्थिक जरिवाना गरेको विभागले जनाएको छ ।
कलंकीस्थित खसी बजारमा ४३ वटा व्यवसायी छन भने यहाँबाट उपत्यकाको मागको ४० प्रतिशत मासु आपूर्ति हुँदै आएको छ ।
२०७६ साउन १९ गते प्रकाशित
वि.सं.२०७६ साउन १९ आइतवार ११:५४ मा प्रकाशित
