काठमाडौं । उपत्यकाको ट्राफिक व्यवस्थापनलाई चुस्त दुरुस्त बनाउन प्रविधियुक्त ट्राफिक व्यवस्थापनमा जोड दिइने भएको छ ।
महानगरीय ट्राफिक प्रहरी महाशाखाले काठमाडौं उपत्यकामा दिनहुँ बढ्दै गएको ट्राफिक समस्या कम गर्न प्रविधिको उच्चतम प्रयोग गरिने बताइएको हो ।
केही दिन अगाडि मात्र महाशाखामा सरुवा भएर आएका महाशाखाका प्रमुख, प्रहरी वरिष्ठ उपरीक्षक भीमप्रसाद ढकालले आफ्नो कार्यकालमा ट्राफिक समस्यालाई प्राथमिकतामा राखेर समस्या समाधानमा तदारुकता देखाउने बताउनुभयो ।
‘सरोकारवाला निकायसँग सहकार्य गर्दै व्यवहारमा विनम्रता, कानून कार्यान्वयनमा कडाइ गरिनेछ ।’ उहाँले भन्नुभयो । ट्राफिक नियमको पालना आम नागरिकको चाहना रहेको भन्दै सबैको सहकार्य आवश्यक रहेको उहाँको भनाई थियो ।
महाशाखा प्रमुख ढकालले चाँडो नै उपत्यकाका हरेक चोकमा ट्राफिक बत्ती जडान गरिने जानकारी दिनुभयो । ‘प्रहरी सङ्गठन प्रमुखको चाहनाअनुसार सम्बन्धित निकायसँगको सहकार्यमा छिट्टै उपत्यकामा ट्राफिक बत्ती जडान गर्नेछौँ ।’ उहाँले भन्नुभयो ।
विगतमा भएका कार्यक्रमलाई निरन्तरता दिँदै आगामी नयाँ कार्यक्रमलाई महाशाखाले अगाडि सार्ने उहाँले बताउनुभयो ।
काठमाडौँ उपत्यकामा हाल दुई हजार १४ किलोमिटर सडकमा झण्डै १० लाख सवारी साधन ओहोर दोहोर गर्दै आइरहेका छन ।
एक ट्राफिक प्रहरीले १.५ किलोमिटर सडक तथा नौ सय सवारी साधनको व्यवस्थापन गर्नुपर्ने हुन्छ ।
२०७६ भदौ २४ गते प्रकाशित
वि.सं.२०७६ भदौ २४ मंगलवार ११:२७ मा प्रकाशित