काठमाडौं । कुमारी बैंक लिमिटेडले चालु आर्थिक वर्षको प्रथम त्रैमासमा सन्तुलित प्रगति गरेको छ । सो अवधिसम्ममा बैंकले ४० करोड १९ लाख ८८ हजार रुपैयाँ खुद नाफा कमाएको छ ।
यो गत आर्थिक वर्षको यसै अवधिको तुलनामा १४.२६ प्रतिशत बढी हो ।गत आर्थिक वर्षको प्रथम त्रैमासको अन्त्यसम्ममा बैंकले ३५ करोड १८ लाख खुद नाफा कमाएको थियो ।
गत आर्थिक वर्षको मुनाफाबाट १० प्रतिशत बोनस शेयर वितरण गरेको यस बैंकको चुक्ता पूँजी ९ अर्ब ५५ करोड ४१ लाख रुपैयाँ रहेको छ ।
बैंकको जगेडा कोषमा २ अर्ब २४ करोड १७ लाख रुपैयाँ र शेयरधनी कोषमा २७ करोड ९१ लाख रुपैयाँ सञ्चित गरेको छ । असोज मसान्तसम्ममा बैंकको वितरण योग्य मुनाफा २५ करोड ४८ लाख रुपैयाँ रहेको छ ।
असोज मसान्तसम्ममा ७८ अर्ब ३० करोड २८ लाख निक्षेप सङ्कलन गरेको यस बैंकले ७७ अर्ब २४ करोड ८४ लाख रुपैयाँ कर्जा लगानी गरेको छ ।
जसबाट बैंकले ९१ करोड ८५ लाख रुपैयाँ खुद ब्याज आम्दानी गरेको छ। बैंकको खुद ब्याज आम्दानी गत आवको यसै अवधिको तुलनामा १० करोड ८ लाख रुपैयाँ बढी हो।
समीक्षा अवधिमा बैंकको सञ्चालन मुनाफा ६ करोड ६२ लाख रुपैयाँ बढेर ५६ करोड ६२ लाख रुपैयाँ पुगेको छ ।बैंकको निष्क्रिय कर्जा गत आवको पहिलो त्रैमासको तुलनामा ०.०९ प्रतिशत विन्दु घटेर १.०५ प्रतिशतमा सीमित भएको छ ।
समीक्षा अवधिमा बैंकको प्रतिशेयर आम्दानी ६३ पैसा बढेर १६ रुपैयाँ ८३ पैसा कायम भएको छ । असोज मसान्तसम्ममा बैंकको प्रतिशेयर नेटवर्थ १२६ रुपैयाँ ३९ पैसा रहेको छ भने मूल्य आम्दानी अनुपात १०.७५ गुणा रहेको छ ।
२०७६ कात्तिक २९ गते प्रकाशित
वि.सं.२०७६ कात्तिक २९ शुक्रवार ०९:५७ मा प्रकाशित
