भरतपुर महानगरपालिका १९ नम्बर वडाको स्थानीय तह निर्वाचनको पुनः मतदान भएको छ । कडा सुरक्षासहित बिहान ७ बजेदेखि मतदान सुरु भएको निर्वाचन कार्यालयले जनाएको छ । बिहानैदेखि भरतपुर क्षेत्रमा पानी परे पनि मतदाताको उपस्थिति उत्साहजनक रहेको छ ।
वडाका ६ वटा केन्द्रमा ३६ कर्मचारीसहित ठूलो संख्यामा सेना, सशस्त्र र प्रहरी परिचालन गरिएको छ । नेपाल प्रहरीका ४ सय ६१ जना, सशस्त्रका ३ सय जना र तेस्रो घेरामा सयभन्दा बढी संख्यामा सेना खटिएका छन् । छुट्टाछुट्टै मोबाइल टोलीको समेत व्यवस्था गरिएको छ ।
वडामा बिहीबार साँझ ७ बजेबाट नै अघोषित रूपमा सवारी आवतजावत बन्द गराएको छ । प्रत्येक केन्द्रमा प्रहरी निरीक्षकको नेतृत्वमा सुरक्षाकर्मी खटाइएको छ ।
मतदानका दिन वर्षाले असर नपुर्याओस् भनेर बुथमा पालसमेत हालिएको छ । सहायक निर्वाचन अधिकृत गम्भीर घिमिरेका अनुसार १९ वडामा ३ हजार ७ सय ९७ मतदाता छन् । शारदा मावि ‘क’ मतदान केन्द्रमा ६ सय ४४, ‘ख’ मा ५ सय ९९ मतदाता छन् । त्यस्तै जीवनज्योति आधारभूत विद्यालयको ‘क’ मतदान केन्द्रमा ६ सय ७२, ‘ख’ मा ६ सय ३४ मतदाता छन् । किरण माविको ‘क’ मा ६ सय ४४ र ‘ख’ मा ६ सय ४ मतदाता छन् ।
वैशाख ३१ को चुनावमा उक्त वडामा २ हजार ८ सय ९७ मत खसेको थियो । गणना क्रममा जेठ १४ गते माओवादी कार्यकर्ताले मतपत्र च्यातेपछि निकै दिन लगाएर निर्वाचन आयोगले पुनः मतदान गर्ने निर्णय लिएको थियो । तर पुनः मतगणनाको माग गर्दै परेको रिटमा सर्वोच्च अदालतले पनि आयोगकै निर्णयअनुसार फैसला गरेपछि पुनः मतदान गर्न लागिएको हो । मंगलबार मुख्य निर्वाचन अधिकृतको कार्यालयमा बसेको सर्वदलीय बैठकले शुक्रबारका लागि मतदान मिति तोकेको थियो ।
मेयरमा एमालेबाट देवी ज्ञवाली र माओवादी केन्द्रबाट रेणु दाहाल चुनावी प्रतिस्पर्धामा छन् । गणनाका क्रममा एमालेका ज्ञवालीले अग्रता लिएका छन् भने निकट प्रतिद्वन्द्वीका रूपमा माओवादीकी दाहाल छिन् । मतदान भइसकेका अन्य सबै वडाको मतगणना भइसके पनि २० नम्बर वडाको मत गन्न भने बाँकी छ ।
प्रकाशित मितिः २०७४ साउन २०
वि.सं.२०७४ साउन २० शुक्रवार १५:०८ मा प्रकाशित
