काठमाण्डौं। नेपाल दूरसञ्चार प्राधिकरणले अधिकृत तृतिय र सहायक प्रथम पदमा २७ जना कर्मचारी माग गरेको छ। प्राधिकरणले प्राविधिकतर्फ एकजना आन्तरिक प्रतिष्पर्धावाट र एकजना खुल्लातर्फ गरि दुई जना र प्रशासनतर्फ पनि एकजना आन्तरिक प्रतिष्पर्धावाट र एकजना खुल्लातर्फ गरि चारजना उपनिर्देशक माग गरेको छ।
त्यस्तै प्रशासनिक अधिकृततर्फ एकजना आन्तरिक प्रतिष्पर्धा र चारजना खुल्ला प्रतिष्पर्धामार्फत माग गरेको छ भने इन्जिनियरिङतर्फ खुल्ला सातजना, महिला दुईजना, आदिवासी जनजाति १ जना, मधेशी एकजना र दलित एकजनागरी कुल १२ जना अधिकृतको माग गरेको छ।
त्यस्तै सहायक प्रथममा प्रशासनतर्फ तीन, महिला एक र आदिवासी जनजातिवाट एकजना गरि कुल पाँचजना कर्मचारीको माग गरेको छ।
आन्तरिक प्रतियोगिताका लागि अधिकृत द्धितिय श्रेणीका लागि १२ सय रुपैयाँ दस्तुर र तृतिय श्रेणीका लागि एक हजार रुपैयाँ लाग्नेछ भने ३० दिनभित्र आवेदन दिइसक्नुपर्ने प्राधिकरणले जनाएको छ।
प्राधिकरणले केहि समय अघि मात्र कर्मचारीको सेवाका शर्त सम्बन्धि विनियमावली २०७३लाई पास गर्दै नयाँ कर्मचारी थपको प्रकृयालाई अगाडि बढाएको थियो।
८ फागुन २०७३, १।००
वि.सं.२०७३ फागुन ८ आइतवार १४:१३ मा प्रकाशित
