कञ्चनपुर । पहिलो पटक राना थारु समुदायले यहाँ रानाथारु सामुदायिक होम स्टे शुरु गरेका छन्। राना संस्कृति र परम्परा जोगाउन तथा त्यसको माध्यमबाट आर्थिक उन्नति गर्न भीमदत्त नगरपालिका वडा नम्बर १४ र १६ नयाँ बस्तीका राना समुदायले होम स्टे संचालनमा ल्याएका हुन्।
बारसिंगाको बथानका लागि दक्षिण एशियामै प्रख्यात शुक्लाफाँटा वन्यजन्तु आरक्षको किनारामै राना समुदायले होम स्टे शुरु गरेपछि पर्यटन गतिविधि बढेको छ।
मंसिरको अन्तिमदेखि संचालनमा आएको नयाँ शैलीको होम स्टे अवलोकन र भ्रममणका लागि ३ महिनाको अवधिमा २ सयभन्दा बढी टोली आइसकेको रानाथारु सामुदायिक होम स्टेका अध्यक्ष समन रानाले बताए।
यहाँ आउने पर्यटनकालागि स्थानियहरुले राना समुदायको संकृति झल्कने नाचहरु समेत देखाउने गरेको अध्यक्ष रानाले बताए। यसका लागि एउटा नाँचको पाँचसय रुपैया तिर्नुपर्ने समेत अध्यक्ष रानाले बताए।
गाउँको चारैतिर पर्यटकहरु रमाउने प्रशस्त ठाउँ र सदरमुकाम महेन्द्रनगरबाट करिब ३ किलोमिटरको दुरिमा रानाथारु सामुदायिक होम स्टे भएकाले नयाँ बस्तीको राना होम स्टे चर्चित बन्दैछ। होम स्टे ले तिन दिनको प्याकेज बनाएर पर्यटकलाई घुमाउने योजना पनि बनाएको छ।
होम स्टे संचालनका लागि सहयोग गरेका महेन्द्रनगरका होटल व्यवसायी परमानन्द भण्डारीले दोधारा चाँदनीको झोलुङ्गे पुल, शुक्लाफाँटा, रानीताल, पिपरैयाको हात्तीसार, हिरापुरको कृष्णसार संरक्षण केन्द्र, बेदकोट ताल, झिलमिला ताल, बाबाताल, सिंहपाल मन्दिर जस्ता पर्यटकीय ठाउँहरु रहेको बताए।
शुक्लाफाँटा आरक्ष र दोधारा–चाँदनीको पुल राना होम स्टेबाट नजिकै रहेका छन् भने बेदकोट र झिलमिला ताल केही टाढा छन्। शुक्लाफाँटाका वन्यजन्तुसहित आसपासका पर्यटकीय क्षेत्रको भ्रमणका लागि ३ दिनको समय पर्याप्त हुने भए पनि पर्यटकहरु हप्तौं रमाउन सक्ने मनोरम ठाउँ पनि पर्याप्त छन्।
चारैतिर पर्यटकीय ठाउँ भएकाले नयाँ बस्तीको राना होम स्टे सबै कुराले उपयुक्त भएको पर्यटन व्यवसायी अमरबहादुर शाहीले बताए।
२०४५ सालमा अर्जुनी ब्यारेक नजिकको आरक्षबाट नयाँबस्तीमा पुनस्थापित गराउ“दा राना समुदाय दुखी बनेको थिए। सदरमुकाम नजिक बस्ती सारिएपछि राना थारु समुदायका परम्परा र संस्कृति पनि विस्तारै हराउ“दै थिए। तर पुनर्स्थापनाको ३५ वर्षपछि घरघरमै पाहुनाको स्वागत गरेर आफ्नै संस्कृति र कला देखाई राना समुदाय नगद आम्दानी गर्न सक्षम भएको छ। राना थारु होम स्टेमा सादा खाना १ सय ३०, मासु खाना साढे दुई सय र बासको प्रति कोठा ४ सय तिर्नुपर्छ।
१७ फागुन २०७२, २.००
वि.सं.२०७२ फागुन १७ सोमवार १६:१७ मा प्रकाशित
