काठमाडौं । निर्वाचन आयोगले खानेपानी तथा सरसफाईमन्त्री प्रेम बहादुर सिंहको पार्टी खारेज गरेको छ । लगातार तीन वर्ष सम्म आय–व्यय विवरणको प्रतिवेदन पेस नगरेको भन्दै सिंहको समाजवादी जनता पार्टी सहित १५ वटा राजनीतिक दल दर्ता खारेज गरिएको हो ।
निर्वाचन आयोगले दल खारेज गर्नुको कारण उल्लेख गर्दै भनेको छ ‘ऐन २०६३ को दफा २४ को उपदफा १ बमोजिम तीन बर्ष सम्म लगातार आय–व्ययको विवरण नबुझाएको र निर्धाारित समय भित्र स्पष्टिकरण समेत पेस नगरेको’ कारण दल खारेज गरिएको हो ।
आयोगले विभिन्न १ सय २० पार्टीलाई समयमा आय–व्यय नवुझाएको भन्दै प्रत्येक पार्टीलाई १ सय रुपैँयाका दरले जरिवाना समेत गरेको छ । आयोगले उनीहरुलाई जरीवाना गरेको छ।
जरिवाना पर्नेमा बहालवाला तीन जना मन्त्रीको पार्टी समेत रहेको छ । जरिवानामा पर्ने मन्त्रीका पार्टीहरुमा उपप्रधान तथा महिला बालबालिकामन्त्री सिपि मैनालीको नेकपा (माले), विज्ञान तथा प्रविधिमन्त्री विश्वेन्द्र पासवानको बहुजन शक्ति पार्टी र उद्योग राज्यमन्त्री मेघराज नेपालीको मधेस समता पार्टी छन् ।
दर्ता खारेजहुने पार्टीहरु
१. समाजवादी जनता पार्टी
२.जनता दल युनाइटेड
३.जनता पार्टी नेपाल
४.नेपाली जनता पार्टी
५.नेपाल जनभावना पार्टी
६.स–शक्ति नेपाल
७.नेपाल राष्ट्रिय लोकतान्त्रिक दल
८.नेपाल राष्ट्रिय जनकल्याण पार्टी
९.जनमुक्ति पार्टी नेपाल
१० .शिव सेना
११.लिवरल समाजवादी पार्टी
१२.नेपाल साम्यवादी दल
१३.नव नेपाल प्रजातान्त्रिक दल
१४.संघीय लोकतान्त्रिक राष्ट्रिय पार्टी
१५. समाजवादी पार्टी
२३ फागुन २०७२/७ : १०
वि.सं.२०७२ फागुन २३ आइतवार १८:५८ मा प्रकाशित
