काठमाण्डौं । सरकारले सार्वजनिक निकायको खरिद अब अनलाइनबाटै गर्ने भएको छ। विहीबार सरकारले सार्वजनिक खरिद प्रणाली सञ्चालन मार्गनिर्देशका जारी गरेपछि बोलपत्रको आह्वान र घोषणा समेत अनलाइनबाटै हुने भएको छ ।
प्रधानमन्त्री केपी शर्मा ओलीले विहीबार पाँच निकायलाई खरिद आह्वानका लागि आइडी हस्तान्तरण गरे। अब सडक विभाग, सिञ्चाँइ विभाग, स्थानीय पूर्वाधार विकास तथा कृषि सडक विभाग (डोलिडार), खानेपानी तथा ढल विकास र जल उत्पन्न प्रकोप नियन्त्रण प्रकोप विभागका बोलपत्र आह्वान र घोषणा अनलाइनबाटै हुनेछन्।
सरकारले सार्वजनिक निकायले निर्माण कार्य गराउँदा खरिदमा अस्वस्थ प्रतिस्पर्धा भएपछि ऐन निर्माण गरेको थियो। तर सञ्चालन मार्गनिर्देशिका अभावमा काम अगाडि बढ्न सकेको थिएन। विहीबारबाट ‘विद्युत खरिद प्रणाली’को सुरुवात भएको हो।
सरकारी निकायहरुले अब www.bolpatra.gov.np मा आफ्नो खरिद आह्वान राख्नेछन्। आपूर्तिकर्ता र प्रस्तावकर्ताहरुले पनि वेवसाइटबाटै प्रतिस्पर्धामा सहभागी हुन पाउँछन्।
२ बैशाख २०७३, ३.००
वि.सं.२०७३ वैशाख २ बिहीवार १६:२३ मा प्रकाशित
