काठमाडौ । भूकम्प लगतै भारतको अघोषित नाकाबन्दी खेप्नुपरे पनि आर्थिक वर्ष २०७२/०७३ मा सरकारले तोकिएको लक्ष्य भन्दा करिब १० अर्ब बढि राजश्व संकलन गर्न सफल भएको छ ।
आन्तरिक राजस्व विभाग र अन्तर्गतका कार्यालयहरुले १ खर्व ९४ अर्व ६७ करोड ६२ लाख ९९ हजार राजस्वको संकलनको लक्ष्य लिएकोमा २०७३ असारसम्म २ खर्व ४ अर्व ४३ करोड ५३ लाख ९२ हजार असुली गरेको छ । अर्थात् लक्ष्यभन्दा ९ अर्व ७५ करोड ९० लाख ९३ हजार वढी राजस्व संकलन गर्न विभाग सक्षम भएको छ ।
२०७३ साल असार महिनासम्मको प्रगति विवरण अनुसार आयकर तर्फ जम्मा १ खर्व १७ अर्व १३ करोड ११ लाख ७४ हजार, मू.अ.कर तर्फ ४९ अर्व ८२ करोड ३५ लाख हजार, अन्तःशुल्क तर्फ ३६ अर्व १९ करोड ३१ लाख ४० हजार, शिक्षा सेवा शुल्क तर्फ ७२ करोड ७ लाख २४ हजार र स्वास्थ्य सेवा शुल्क तर्फ ५६ करोड ६८ लाख १८ हजार समेत जम्मा २ खर्व ४ अर्व ४३ करोड ५३ लाख ९२ हजार असुली भएको विभागले जनाएको छ ।
आर्थिक वर्ष २०७२/०७३ को लागि आयकर तर्फ जम्मा १ खर्व ९ अर्व ७ करोड ४७ लाख ४३ हजार, मू.अ.कर तर्फ ४८ अर्व १८ करोड १ लाख ४२ हजार, अन्तःशुल्क तर्फ ३५ अर्ब ९४ करोड ५७ लाख ९२ हजार, शिक्षा सेवा शुल्क तर्फ ६४ करोड ६८ लाख ४८ हजार र स्वास्थ्य सेवा शुल्क तर्फ ८२ करोड ८७ लाख ७४ हजार लक्ष्य समेत जम्मा १९४ अर्व ६७ करोड ६२ लाख ९९ हजार लक्ष्य तोकिएको थियो ।
प्रकाशित मिति ः २०७३ साउन ६
वि.सं.२०७३ साउन ६ बिहीवार २०:३० मा प्रकाशित
