काठमाण्डौं । नेपाल राष्ट्र बैंकले एकिकृत निर्देशन जारी गर्दै एफपिओ ऋणमा कडाइ गरेको छ । यस निर्देशन अनुसार फरदर पब्लिक अफरिङ (एफपिओ) को सेयर खरीद गर्न बैंक तथा वित्तीय संस्थाले ऋण दिन नपाउने भएका छन् । यसअघि साधारण सेयर खरीद गर्न ऋण दिन नपाइने ब्यवस्था थियो ।
साधारण सेयरमा मात्र यस्तो कडाइ गरेको नेपाल बैंकले अहिले एफपिओमा पनि यस्तो निर्देशन दिएको हो । नेपाल इन्भेष्टमेन्ट बैंकले जारी गरेको एफपिओमा केही बैंकले ऋण लगानी गरेको भन्ने समाचार सार्वजनिक भएपछि राष्ट्र बैंकले यसमा कडाइ गरेको हो ।
सेयर बिक्रीका लागि आह्वान गरिएको सात दिनभित्र पनि सेयर बिक्री नभए आठौं दिनबाट भने ऋण लगानी दिन पाइने छ । तर आफ्नो सहायक कम्पनीको सेयरमा भने मूल कम्पनीले ऋण दिन पाइँदैन । अन्य बैंक तथा वित्तीय संस्थाले भने आठौं दिनबाट ऋण दिन पाउँछन् । आठौं दिनबाट पनि बैंकहरुले ५० प्रतिशत नगद मार्जिन राखेर मात्र ऋण दिनु पर्ने हुन्छ । यस्तो कर्जाको पुनर्संरचना र पुनर्तालीकीकरण गर्न पाइँदैन ।
१९ साउन २०७३, १०।००
वि.सं.२०७३ साउन १९ बुधवार ११:१७ मा प्रकाशित