काठमाण्डौं । बाबा रामदेवले पूजापाठका लागि प्रयोग हुने सामानको उत्पादन बजारमा ल्याउन लगाएका रिपोर्ट सार्वजनिक भएको छ । यही क्रममा रामदेवको पतञ्जली आयुर्वेदले बजारमा ‘पतञ्जली आस्था’को नामबाट नयाँ ब्राण्ड ल्याउने तयारी थालेको छ ।
यो ब्राण्डको नामबाट आगामी दीपावलीअघि १ सय भन्दा धेरै प्रोडक्टहरु बजारमा ल्याउने तयारी भइरहेको हो । पूजापाठमा प्रयोग हुने प्रोडक्टको माध्यमबाट बाबा रामदेवले ५ करोडभन्दा बढी मानिसलाई रोजगारी दिने योजना समेत बनाएका छन् ।
पतञ्जलीका प्रवक्ता एसके तिजारवालाले ‘पतञ्जली आस्था’ ब्राण्डको नामबाट पूजापाठमा प्रयोग हुने प्रोडक्टहरु बजारमा ल्याइनेछ । यसमा पूजामा प्रयोग हुने सबै खालका प्रोडक्टहरु रहनेछन् । अगरबत्ती, धूप बत्ती, चन्दन, तिलक, हवन सामाग्री, दियो, थाली जस्ता सामानहरु सो ब्राण्डबाट बजारमा आउनेछन् । पतञ्जलीको अगरबत्ती र हवन सामाग्री चाहि यसअघि नै बजारमा आइसकेको छ । बाँकी सबै प्रोडक्टहरु अबको दुई महिनाभित्रमा बजारमा आइसक्ने बताइएको छ । यी प्रोडक्टहरु अनलाइनबाट समेत बिक्री गर्ने योजना बनाइएको छ ।
तिजारवालाका अनुसार ‘पतञ्जली आस्था’को सबै प्रोडक्ट पूर्ण रुपमा प्राकृतिक र वातावरणमैत्री हुनेछन् । यी कुनै प्रोडक्टमा कुनै पनि प्रकारको हानीकारक केमिकल प्रयोग गरिने छैन ।
तिहारअघि बजारमा
पतञ्जलीले तिहारअघि नै पूजापाठका सबै प्रोडक्टहरु बजारका स्टोरहरुमा जम्मा गरिसक्ने योजना बनाएको छ । यसका लागि आगामी केही दिनभित्रै यसको बजार रणनीति बनाइनेछ । तिहारसम्म यी प्रोडक्टहरु भारतभरि र नेपालमा समेत वितरण गर्ने योजना बनाइएको छ । पतञ्जली स्टोर बाहेक भारत र नेपालका साना–साना स्टोरहरुमा समेत यी सामान पाउने गरी तयारी थालिएको बताइएको छ ।
प्रकाशितः २०७३ भदौ ११
वि.सं.२०७३ भदौ ११ शनिवार १२:४१ मा प्रकाशित
