काठमाडौं । हिमालय एयरलाइन्सले आजदेखि काठमाडौं-श्रीलंका (कोलम्बो) हवाइ रुटमा सीधा उडान सुरु गरेको छ । बिहान साढे ११ बजे एयरबस ३२० सिरिजको नाइन एन एएलएएन कलसाईन भएको जहाज कोलम्बोका लागि उडेको हो ।
१ सय ५८ सिट भएको उक्त बिमानबाट हिमालयले अब हप्तामा ३ दिन श्रीलंकामा उडान गर्ने कमर्सियल महाप्रवन्धक राजु केसीले जानकारी दिए। उनका अनुसार पहिलो दिन आज १ सय जना यात्रुहरु बोकेर जहाज कोलम्बो उडेको छ ।
तिव्वत एयरलाइन्सको पनि लगानी रहेको हिमालय एयरलाइन्सले आफ्नो दोस्रो गन्तव्यको रुपमा कोलम्बोमा उडान गरेको हो । यसले नेपाल र श्रीलंकबीच प्रत्यक्ष हवाई सम्पर्क स्थापित भएको बताइएको छ । मंगलबार, बिहीबार र शनिबार बिहान साढे ११ बजे त्रिभुवन अन्तर्रा्ष्ट्रिय विमानस्थलबाट उडान हुनेछ ।
सवा ३ बजे श्रीलंकाको राजधानी कोलम्बोमा पुगी पुनः सवा ४ बजे त्यहाँबाट उडान भएर सवा ८ बजेतिर विमान काठमाडौं फर्किनेछ। एयरलाइन्सले ‘इकोनोमिक क्लास’को लागि एकतर्फी भाडा २९ हजार १ सय ९१ रुपैयाँ निर्धारण गरको छ । राउण्ड ट्रिपका लागि ५० हजार ४१ रुपैयाँ तोकिएको छ ।
त्यस्तै विजनेस क्लासको टिकटको लागि एकतर्फी ४९ हजार ३ सय १९ र राउन्ड ट्रिपको लागि ८२ हजार रुपैयाँ निर्धारण गरिएको छ ।
प्रकाशितः २०७३ असोज १५
वि.सं.२०७३ असोज १५ शनिवार १४:०२ मा प्रकाशित
