काठमाण्डौं । महुली सामुदायिक लघुवित्त वित्तीय संस्थाले एक लाख बीस हजार कित्ता प्राथमिक सेयर निष्कासन गर्नका लागि धितोपत्र बोर्डमा आवेदन दिएको छ । कम्पनीले एक महिना पहिला नै एन.सि.एम. मर्चेण्ट बैंकिङ्ग लिमिटेडलाई सेयर निष्काशन तथा बिक्री प्रवन्धकमा नियुक्त गरिसकेको छ ।
सप्तरीको बकधुवा ९ महुलीमा रहेको कम्पनी नेपाल राष्ट्र बैंकबाट घ वर्गको इजाजत प्राप्त संस्था हो । २०७० जेष्ठ ३० गतेबाट कारोवार संचालन गर्दै आएको यो संस्थाले हाल सप्तरी, सिरहा, उदयपुर, सुनसरी, खोटाङ्ग, भोजपुर, ओखलढुङ्गा, सिन्धुली, धनकुटा र रामेछाप गरी १० जिल्लाको कार्यक्षेत्रमा २८ वटा शाखा कार्यालय मार्फत वित्तीय सेवा प्रदान गरिरहेको छ ।
अहिले २ करोड १५ लाख रुपैंया चुक्ता पूँजी रहेको लघुवित्तको सेयर निष्काशन पश्चात चुक्ता पूँजी ३ करोड ३५ लाख रुपैंया पुग्नेछ । गत आर्थिक वर्षमा लघुवित्तले ४ करोड ३६ लाख ६९ हजार रुपैंया खुद नाफा कमाएको थियो । लघुवित्तको जगेडा कोषमा ९ करोड ४९ लाख रुपैंया सञ्चित छ ।
संस्थाले हालसम्म ९६ करोड ४३ लाख रुपैयाँँ लगानी गरेको छ भने सदस्यहरुको बचत ४९ करोड ४१ लाख रुपैयाँ निक्षेप रहेको छ । संस्थाका ५४ हजार सेवा ग्राही रहेको कम्पनीले जनाएको छ ।
१९ कार्तिक २०७३, ११।००
वि.सं.२०७३ कात्तिक १९ शुक्रवार ११:१४ मा प्रकाशित
