काठमाण्डौं । भूकम्पबाट क्षतिग्रस्त संरचना पुनः निर्माणका लागि अर्थ मन्त्रालयले राष्ट्रिय पुनःनिर्माण प्राधिकरणलाई ३३ अर्ब रुपैयाँ निकासा दिएको छ ।
उपप्रधान तथा अर्थमन्त्री कृष्णबहादुर महराले पुनःनिर्माण कोषको रकम परिचालन गर्ने गरी निजी आवास अनुदान वितरण गर्न थप २८ अर्ब रुपैयाँ र विद्यालय भवन पुनःनिर्माणका लागि चार अर्ब रुपैयाँ निकासा दिएको जानकारी दिए।
त्यस्तै भूकम्प प्रभावित जिल्लाका सरकारी भवन पुनःनिर्माणका लागि ७५ करोड रुपैयाँ र जग्गा मुआब्जा वितरण गर्नका लागि २५ करोड गरी कुल ३३ अर्ब रुपैयाँ निकास दिएको पुनःनिर्माण प्राधिकरणका प्रवक्ता रामप्रसाद थपलियाले जानकारी दिए।
रकम निकासासँगै सरकारी विद्यालय, सरकारी भवन तथा ग्रामीण सडक पुनःनिर्माणका लागि स्रोतसाधन परिचालन गराउन सहज हुने विश्वास अर्थ मन्त्रालयले लिएको छ । पुनःनिर्माणका कार्य अघि बढाउन स्रोतको सुनिश्चितता प्रदान गरिएको र कार्य प्रगतिका आधारमा थप रकम निकासा गर्दै जाने अर्थमन्त्री महराले विश्वास व्यक्त गरे ।
२२ मंसिर २०७३, १२।००
वि.सं.२०७३ मंसिर २२ बुधवार २०:०९ मा प्रकाशित
