नरेश के.सी
भैरहवा । धेरै नेपालीले ऊट देखेका छैनन कतिपयले त नाम समेत सुनेका छैनन । ऊट मरुभूमीमा रहने जनावर हो । तर समय र परिस्थीतिले मरुभूमिको ऊट अहिले भैरहवा आएको छ । भैरहवा आएको मात्रै होइन अहिले भैरहवाको मेलामा मरुभूमिमा मात्रै देखिने ऊटले पुरानो डुंगाको गीतमा नाचेंर रिसाएर दर्शकहरुलाई फकाइरहेको छ ।
डण्डा नदिमा नयां डुंगामा नेपाली झण्डा फहराउदैं दर्शकहरु हुटिंग गरिरहदा नदीको किनारमा रहेको मेलाको सचिवालय नजिकै रहेको ऊटले नेपाली कथानाक चलचित्र पुरानो डुंगाको बहुचर्चित गीत निर जैले रिसाउने जैले रिसाउने, कहिले होला माया संग माया मिसाउने गीतमा छमछमी नाचेर दर्शक बटुल्न सफल भएको छ ।
स्टलहरु घुम्दा घुम्दै थाकेर लखातरन परेका मेला अवलोकन गर्न आएका दर्शकहरुलाई मरुभूमीमा बस्ने ऊटले नेपाली गीतमा ताल मिलाई मिलाई नाचेको
देख्दा थाकेर जवरजस्ती मनमनै उठेको रिस पनि त्यसै हराएर जाने गरेको दर्शकहरुले जनाए ।
गएको मंसिर १० गते रिलीज भएको पुरानो डुंगाको गितका गायककार कालि प्रसाद बास्कोटाको उक्त गीतमा ऊट नाच्दा दर्शकहरु अत्यन्तै आश्चर्यचकित भएका देखिन्थे । ऊट ताल मिलाई मिलाई नाचिरहदा छेऊमै रहेको संसारकै सबैभन्दा ठूलो पंक्षि अस्ट्रीच पनि नाचिरहेको देखिन्थ्यो ।
यता विहीबार डण्डामा अर्को डुंगा पनि थपीएको छ भने आयोजकहरुले भारतीय अतिथीहरुलाई निम्तो गर्न सीमावर्ति भारतीय बजारमा प्रमोशन कार्यक्रम गरेका छन् ।
मेलामा हस्तकला देखी बुद्ध सर्किटको फोटो प्रदर्शनी, निशुल्क इन्टरनेट सुविधा, भैरहवा आइडल र राष्ट्रिय कलाकारको विशेष प्रस्तुति रहेको मेला मुल आयोजक समिती सदस्य भोजेन्द्र खत्रीले जनाए ।
गएको मंगलबारदेखी भैरहवामा राष्ट्रिय पर्यटन प्रबद्र्धन, कृषि तथा औद्योगिक व्यापार मेला २०७३ चलिरहेको छ । मेला पर्व अहिले नेपालमै फेसन जस्तै भइरहेको बेला भैरहवामा चालु मेलामा भने विभिन्न आकर्षक तत्व रहेको देखिएको छ । मेला आयोजकले दर्शकहरु तान्नकोलागी विभिन्न आकर्षक तत्वलाई समायोजन गर्ने भरमग्दुर प्रयास गर्ने गर्दछन् । त्यसै मेसोमा भैरहवाको मेला आयोजक सिद्धार्थ होटल एशोसियसन (सान) र रूपन्देही क्रिकेट संघले पनि मेलालाई सबैको सल्लाहअनुसार व्यवस्थापन गरिरहेको मेला सल्लाहकार मनोरन्जन शर्माले जानकारी दिए । मेला आयोजक सानका अध्यक्ष समेत रहेका मेला समितीका संयोजक चन्द्रप्रकाश श्रेष्ठले मेलालाई थप आकर्षण गराउन डण्डामा बोटिंग, स्टेचमा भैरहवा आइडल र स्टलमा ऊट नाचले दर्शक तानेको प्रतिक्रिया दिए ।
माघ २७
वि.सं.२०७३ माघ २८ शुक्रवार ०७:०२ मा प्रकाशित
