काठमाडौ । एनआइसी एसिया बैंकले आक्रामक रुपमा शाखा विस्तार गरेको छ । गत असारदेखि चैत २ गतेसम्म २१ वटा शाखा विस्तार गरी ८९ वटा शाखा संख्या पुर्याएको बैंकले यही चैत ३० गतेभित्र थप २१ वटा शाखा खोल्ने तयारी गरेको छ । बैंकले चैत दुई गते अर्थात आजमात्रै सात वटा शाखा उद्घाटन गरेको छ ।
बैंकले पूर्वको झापा बुधबारे र गौरादह, मोरङको पथरी, सुनसरीको झुम्का, धनकुटाको हिलेमा बुधबार शाखा विस्तार गरेको छ । त्यसैगरी पश्चिममा नवलपरासीको बर्दघाट र सुदूरपश्चिममा कैलालीको लम्कीमा पनि बुधबार नै शाखा कार्यालय स्थापना गरी कारोबार सुरु भएको बैंकले जनाएको छ । यसअघि बैंकले यही फागुन १८ गते मुगु र कालिकोटको सदरमुकाममा दुई वटा शाखा विस्तार गरेको थियो ।
बैंकका अनुसार यही चैत मसान्तसम्ममा थप २१ शाखा खोल्ने तयारी गरिएको छ । जसअनुसार सुनसरीको दूहवी, चितवनको पर्सा, टाँडी र हाकिमचोक, तनहुँको दूलेगौडा, भिमाद, कास्कीको न्यूरोड, लेकसाईड, नयाँ पूल, रुपेन्देहीको मनिग्राम, सालझण्डी, रुद्रपुर, ढकधई, सौफार्साटिकर, नवलपरासीको धूमही, पाल्पाको तानसेन, दाङको घोराही, कैलालीको टिकापुर, बाउनियाँ, बर्दियाको मगरागढी र बाँकेको खजुरामा चैत मसान्तभित्र शाखा खोलिने बैंकले जनाएको छ ।
प्रकाशित मितिः २०७३ चैत २
वि.सं.२०७३ चैत २ बुधवार १६:४७ मा प्रकाशित
